လူကြိုက်များ ကျော်ကြားရေ၊ အပ်ပါးလ် အိုင်ဖုန်းအပ်(ပ) အင်တန်များများ၊ ဖုန်းမျက်နှာပြင် ဆကြိန်ထဲမှာ ရှိနိန်စွာတိကို ပိုင်ရှင် မသိဘဲ၊ ခိုးယူနိန်စွာတိကို တွိရရေလို့၊ TechCrunch က အစီရင်ခံစာတစောင် ထွက်ပေါ်လာပါရေ။ ယင်းအတွက်နန့် ဖုန်းမှာ အပ်(ပ)တိကို ဒေါင်းလုဒ် လုပ်ကေ၊ သတိထားလုပ်ကတ်ဖို့ လိုရေလို့ TechCrunch က တိုက်တွန်းထားပါရေ။
အေ အပ်(ပ)တိစွာ၊ ဖုန်းထဲက အချက်အလက်တိကို ခိုးယူရုံတင်မက၊ ယင်းလူ ဖုန်းဆကြိန်မှာ ဇာတိကို သုံးနိန်ရေ၊ ဇာတိကို စိတ်ဝင်စားရေ၊ ဇာတိ လုပ်နိန်ရေ ဆိုစွာကအစ၊ ရအောင် ခိုးယူနိန်ကတ်တေလို့ ဆိုပါရေ။
အေခိုးယူနိန်ရေ အပ်(ပ)တိအထဲမှာ ကန်နေဒါ လေကြောင်း(Air Canada)၊ အိက်ဆ်ပီးဒီးယား(Expedia)၊ ဟိုတဲလ်ဆ် ဒေါ့တ် ကင်း(Hotels.com)၊ ဆိန်ဂါပေါ် လေကြောင်း(Singapore Airlines) နန့် အပ်ဘာခြွင်ဘီ အန် ဖဲ့တ်ချ်(Abercrombie & Fitch)ရို့လည်း ပါနိန်စွာကို တွိရပါရေ။
အေအပ်(ပ)တိအထဲမှာ၊ မှန်ဘူး(Glassbox)လို့ ခေါ်ရေ ကင်ပဏီတခုက ထုတ်တေ၊ ဆပ်ဆ်ဆန် ရီပလဲ(session replay)ဆိုရေ ဆော့ဖ်ဝဲလ်ကို ထည့်ထားပနာ၊ ယင်းဆော့ဖ်ဝဲလ်က ဖုန်းသုံးနိန်ရေ လူတိ ဖုန်းမျက်နှာပြင်မှာ လုပ်နိန်ကတ်စွာတိ အားလုံးကို၊ ဆကြိန်ကူးပုံစံနန့် ခိုးကူးနိုင်ရေလို့ ဆိုပါရေ။
တချို့ အပ်(ပ)တိက၊ ခိုးကူးထားရေ ဆကြိန်ပုံတိကို၊ မှန်ဘူး(Glassbox) ကင်ပဏီကို ပို့ပီးကတ်တေပိုင်၊ တချို့ အပ်(ပ)တိက ကိုယ့်ကင်ပဏီ ဆာဗာထဲကို တိုက်ရိုက်ပို့ပီးကတ်တေလို့ TechCrunch က ဆိုပါရေ။
အပ်ပါးလ် အပ်(ပ) ဆတိုး(Apple’s App Store)က၊ ယင်းပိုင် ဆကြိန်တိ ကူးဖို့ဆိုကေ၊ ပိုင်ရှင်ကို အသိပီးရဖို့လို့၊ အတိအလင်း ထုတ်ပြန်ထားကေလည်း၊ အေကင်ပဏီတိက ပိုင်ရှင်ကို အသိမပီးဘဲ ခိုးကူးနိန်ကတ်စွာကို တွိရရေလို့ ဆိုပါရေ။
