ဆရီ လန်ကန်နိုင်ငံမှာ ဗုံး ၆ လုံးပေါက်၊ လူ ၁၆၀ လောက် သီ၊ ရာချီ ဒဏ်ရာရ

© Instagram / jeevan_rajeevan
© Instagram / jeevan_rajeevan

အေနိ အီဆတာ တနင်္ဂနီနိ ကျင်းပနိန်ရေ ဆရီ လန်ကန်နိုင်ငံက၊ ဇိမ်ခံဟိုတဲလ်တိနန့် ကတ်သိုးလဲ့ ခြဲ့ဆ်ရှန်ဝတ်ပြုကျောင်းတိမှာ ဗုံး ၆ လုံး ပေါက်ကွဲရေအတွက်၊ လူ ၁၆၀ လောက် သီဆုံးပနာ၊ ရာချီပနာ ဒဏ်ရာ ရလားကတ်တေလို့၊ မီဒီယာတိနန့် ရဲ သတင်းတိကို ကိုးကားပနာ ဖော်ပြကတ်စွာကို တွိရပါရေ။

အေနိ မိုးသောက် ၈ နာရီ ၄၅ မိနစ်မှာ၊ ကိုလင်ဘိုမြို့(Colombo)က ဆိန့် အန်တိုနီ’ဆ် ဘုရားကျောင်း(St. Anthony’s Church)နန့် နီဂုံဘိုမြို့(Negombo)က ဆိန့် ဆီဘဆတိန်း’ဆ် ဘုရားကျောင်း(St. Sebastian’s Church)ရို့မှာ တပြိုင်တည်း ဗုံးတိ ပေါက်ကွဲကတ်တေလို့ ဆိုပါရေ။ အရှိဖက် ကမ်းခြေ ဘတ္တီကာလုတ်မြို့(Batticaloa)က ဇီယွင် ဘုရားကျောင်း(Zion Church)လည်း ဗုံးဖောက်တေ အထဲမှာ ပါရေလို့ သိရပါရေ။

တချိန်တည်းလောက်မှာ ကြယ် ၅ ပွင့် အဆင့်ရှိရေ၊ ရှန်ဂြီ-လာ(Shangri-La)၊ စိမ်နာမွင် ဂြမ်းဒ်(Cinnamon Grand) နန့် ကိန်းဆ်ဘာရီ(Kingsbury) ဟိုတဲလ်ကြီးတိမှာလည်း ဗုံးပေါက်ကွဲရေလို့ သိရပါရေ။ တိုက်ခိုက်မှုတိအားလုံး ဆက်စပ်နိန်ရေလို့ ဆိုပါရေ။

ရဲကို ကိုးကားပနာ၊ လူ ၁၅၆ ယောက် သီပနာ၊ ၄၀၀ ကျော် ဒဏ်ရာရရေလို့ အေအပ်ဖ်ပီ(AFP) သတင်းဌာနက တင်ပြထားစွာကို တွိရပါရေ။

Leave a Reply

Please Login to comment
  Subscribe  
Notify of