အိန္ဒိယမှာ နှစ် ၁၀၀ အတွင်း ဒုတိယအအီးဆုံးလလို့ သတိပီး

Homeless people stand in a line to collect food on a cold winter's morning in Delhi © REUTERS/Anushree Fadnavis
Homeless people stand in a line to collect food on a cold winter's morning in Delhi © REUTERS/Anushree Fadnavis

အိန္ဒိယနိုင်ငံမှာ၊ အေဒီဇင်ဘာလစွာ နှစ် ၁၀၀ အတွင်းမှာ ဒုတိယမြောက် အအီးဆုံးလ ဖြစ်ဖို့လို့ အိန္ဒိယနိုင်ငံ မိုးလေဝါသနန့် ဇလဗေဒဌာနက သတိပီးထားပါရေ။

လက်ရှိ ဒေလီမြို့တော်မှာ အပူချိန် ၂.၈ ဆဲဆီးရပ့်ဆ်(Celsius)ထိ ထိုးကျနိန်ပနာ၊ အေထက် ပိုကျလာဖို့သိမ့်ဆိုဗျာလ်၊ မိုးလေဝါသနန့်ဇလဗေဒဌာနက အနီရောင်အဆင့် သတိပီးချက် ထုတ်ပြန်ထားပါရေ။

“အပြင်းဆုံး အအီးလှိုင်း အနိန်အထား”ထဲမှာ နှင်းတိ ပိန်းပိတ်ဗျာလ်၊ နှင်းသီးမုန်တိုင်းတိ ကျနိုင်ရေလို့လည်း သတိပီးထားပါရေ။

ပိုဆိုးစွာက ဒေလီမြို့တော်မှာ လီထုညစ်ညမ်းမှုကလည်း “အဆိုး” အဆင့်မှာ ရောက်နိန်ရေလို့ ဆိုပါရေ။ မိုးလေဝါသအရာရှိတိက အပူချိန် ကကောင်း ကျဆင်းနိန်ရေအတွက်၊ စိုထိုင်းဆများပနာ၊ လီငြိမ်နိန်ရေအတွက်၊ လီထုညစ်ညမ်းမှုက ပျောက်လားဖို့ မဟုတ်သိမ့်လို့ ဆိုပါရေ။

ရာသီဥတု ဆိုးရွားနိန်ရေအတွက်၊ ရထားလိုင်းတိနန့်၊ လေယာဉ်ပျံလိုင်းတိလည်း နောက်ကျစွာတိ ဖြစ်နိန်ပါရေ။ ကားလမ်းတိလည်း ပိတ်ပနာ၊ ခရီးသည်တိ ဒုက္ခရောက်နိန်ကတ်ပါရေ။

အိန္ဒိယတနိုင်ငံလုံးက လမ်းတိ၊ အိမ်တိမှာ မီးဖိုတိ ဖိုပနာ၊ အချမ်းသက်သာအောင် လုပ်နိန်ကတ်ရရေအတွက်၊ အစိုးရကလည်း နားခိုဖို့ နိန်ရာတိနန့်၊ ထင်းတိကို ထောက်ပံ့ပီးနိန်ရေလို့ ဆိုပါရေ။

© REUTERS/Adnan Abidi

ဥတ္တာ ပရာဒတ်ပြည်နယ်မှာ အအီးဒဏ်နန့် သီရေလူ ၂၈ ယောက် ရှိဗျာလ်လို့လည်း၊ ဒေသသတင်းတိမှာ ဖော်ပြထားပါရေ။ နှစ်သစ်ကူးရက်မှာတော့ အပူချိန် မြင့်လာဖို့လို့ မိုးလေဝါသနန့်ဇလဗေဒဌာနက ခန့်မှန်းထားပါရေ။