တရုတ်နိုင်ငံ ဝူဟန်းမြို့(Wuhan)က လူပေါင်း ၂၆ ယောက် သီပနာ၊ ၈၃၀ အထိ ကူးစက်ပြန့်ပွားလာရေ ကိုရိုနာဗိုင်းရာ့ဆ် အနီးကပ်ဓါတ်ပုံတိကို တရုတ်အစိုးရက ပထမဆုံး ထုတ်ပြလိုက်ပါရေ။
တရုတ်သိပ္ပံအကယ်ဒမီ(Chinese Academy of Sciences) အောက်မှာ ရှိရေ၊ အနုဇီဝဗေဒ နည်းပညာတက္ကသိုလ်(The Institute of Microbiology)က အေနိ ထုတ်ပြလိုက်စွာပါ။ တခြားနီရာတိကို မကူးစက် မပြန့်ပွားရအောင်အတွက်၊ ဝူဟန်းမြို့မှာ လူပေါင်း ၁၈ သန်းကျော်ကို တခြားနီရာတိကို လားခွင့်မပြုဘဲ ပိတ်ထားပါရေ။
ကိုရိုနာဗိုင်းရာ့ဆ်(Coronavirus (ဝါ) 2019-nCoV)စွာ အရှိအလယ်ပိုင်း အသက်ရှူလမ်းကြောင်းရောဂါ(Middle East Respiratory Syndrome (MERS-CoV)) နန့် အပြင်းစား အသက်ရှူလမ်းကြောင်းကျဉ်းရောဂါ(Severe Acute Respiratory Syndrome (SARS-CoV)၊ ၂ မျိုးလုံးနန့် ဆက်စပ်နိန်ပနာ၊ အဂုဆိုကေ ဗီယတ်နန်၊ ထိုင်း၊ ဂျပန်၊ ဆိန်ကာပေါ်၊ တောင်ကိုးရီးယား၊ ထိုင်ဝမ်၊ ဟောင်ကောင်နန့် အမေရီကန်ပြည်ထောင်စု အထိ ပြန့်နှံ့လားပါဗျာလ်။
ရောဂါ လက္ခဏာက သာမန် အအီးပတ်တေ ပုံစံကနိန်၊ အဆုတ်ကူးစက်ရောဂါပုံစံမျိုးထိ ပြသတတ်ပနာ၊ မျက်နှာဖုံးတိ၊ အများ မကူးစက်အောင် ခရီးသည်တိကို အပူချိန်တိုင်းပနာ စစ်ဆေးမှုတိ လုပ်နိန်ကေလည်း၊ အေကူးစက်ရောဂါကို အဂုအချိန်ထိ မထိန်းချုပ်နိုင်သိမ့်ပါ။
အေရောဂါကို ထိန်းချုပ်ဖို့အတွက် ဝူဟန်းမြို့မှာ သီးသန့်ဆေးရုံတခုကိုလည်း ၆ ရက်အတွင်း ဆောက်နိန်စွာကို တွိရပါရေ။