အေနိမှာ နောက်ထပ် ၂၄ ယောက် ထပ်သီရေအတွက်၊ အဂုဆိုကေ ကိုရိုနာဗိုင်းရာ့ဆ်(coronavirus (2019-nCoV))နန့် သီရေ လူအရေအတွက် ၁၀၆ ယောက်ထိ မြင့်တက်လာရေလို့ ဟူဘီဒေသ(Hubei province) အာဏာပိုင်တိက သတင်းထုတ်ပြန်လိုက်ပါရေ။ တရုတ်နိုင်ငံအနှံ့မှာ ကူးစက်ပြန့်ပွားမှုပေါင်း ၄,၅၀၀ ကျော် ရှိလာရေလို့လည်း ဆိုပါရေ။ တရုတ်နိုင်ငံမြို့တော် ဘီဂျင်း(Beijing)မှာလည်း လူနာ ၁ ယောက် ပထမဆုံး သီလားပါရေ။
၂၄ နာရီအတွင်း နောက်ထပ် ၂,၈၃၅ ယောက် ထပ်ပနာ ကူးစက်ခံလာရရေအတွက်၊ အေနိဆိုကေ တရုတ်နိုင်ငံထဲမှာ ကူးစက်ခံနိန်ရရေ လူပေါင်း ၄,၅၁၅ ယောက်ထိ ရှိလာပါဗျာလ်။
တရုတ်သမ္မတ ရှီ ဂျင်းပိန်(Xi Jinping)ကလည်း အေဗိုင်းရာ့ဆ်စွာ “မိတ္ဆာကောင်” နန့် တူရေလို့ နှိုင်းယှဉ်လိုက်ပနာ၊”အေမိတ္ဆာကောင်ကို တခုပိုင်း ပုန်းဝှက်နိန်ဖို့အတွက် ငါရို့ ခွင့်မပြု” လို့ ဆိုပါရေ။ ဇာဖြစ်ဖြစ် ရအောင်ကို တားဆီးလားဖို့လို့ ကတိပီးထားပါရေ။
တရုတ်နှစ်သစ်ကူးရုံးပိတ်ရက်ကိုလည်း ဖေဘြူရာရီလ(feh·byoo·uh·ree) ၂ ရက်နိထိ တိုးပိတ်လိုက်ပနာ၊ လူဝင်မှုကြီးကြပ်ရေး အာဏာပိုင်တိကလည်း ရောဂါမပြန့်ပွားအောင်၊ နိုင်ငံခြားခရီးတိ မထွက်ကတ်ဖို့ ညွှန်ကြားထားပါရေ။ အဂုဆိုကေ အမေရီကန်ပြန်ထောင်စု၊ ကန်နေဒါ၊ ပြင်သစ်၊ ဂျာမဏီနန့် တခြား ၁၅ နိုင်ငံထိ အေပိုင်းရာ့ဆ်က ပြန့်ပွားနိန်ပါဗျာလ်။
ဂျပန်နိုင်ငံမှာ ဂျပန်ဘက်ဆ်ကားဒရိုင်ဘာတယောက်စွာ တရုတ်နိုင်ငံ ဝူဟန်းမြို့ကလာရေ ခရီးသည်တိကို လိုက်ပို့ယင်း ဗိုင်းရာ့ဆ် အကူးခံလိုက်ရပနာ၊ ဂျာမဏီနိုင်ငံမှာလည်း ဂျာမန်လူမျိုးတယောက် လေ့ကျင့်ခန်းလုပ်တေ တရုတ်သငယ်ချင်းဘားက အကူးခံလိုက်ရပါရေ။
အေဗိုင်းရာ့ဆ် ပြန့်ပွားလာရေအတွက်၊ အာရှ၊ ဥရောပနန့် ယူအတ်ဆ် ဆတော့ခ်စျီးကွက်တိကို ရီအီးသွန်ချပလိုက်တေပိုင်၊ စျီးကွက်တိ ငြိမ်ကျလားပနာ၊ ရနံစျီးလည်း ၁၀ ရက်အတွင်းမှာ ၁၀% ထိ ထိုးကျလားပါရေ။