ကိုရိုနာဗိုင်းရာ့ဆ် အကူးခံထားရရေ လူနာ ၂ ယောက်ကို၊ ခုခံအားကျဆင်းရေရောဂါ အိပ်ချ်အိုင်ဗွီ(HIV) ကုစွာမှာ သုံးရေ ဗိုင်းရာ့ဆ်ကာကွယ်ဆီး ၂ မျိုးကို စပ်ပနာ ထိုးပလိုက်တေမှာ၊ ၄၈ နာရီအတွင်း ကိုရိုနာဗိုင်းရာ့ဆ် လုံးဝ ပျောက်လားရေလို့ ထိုင်းဆီးအဖွဲ့က ပြောပါရေ။
ဘန်ကော့ခ်မြို့(Bangkok) ရာဂျဗိသိဆေးရုံ(Rajavithi Hospital)က ဆရာဝန် ကရီယန်ဆတ် အတ္တီပွင်ဝါနီ(Dr.Kriangsak Atipornwanich)စွာ၊ ကိုရိုနာဗိုင်းရာ့ဆ်နန့် အသည်းအသန် ဖြစ်နိန်ရေ၊ တရုတ်နိုင်ငံက အသက် ၇၂ နှစ်အရွယ် ဝါကြီးမတယောက်ကို အိပ်ချ်အိုင်ဗွီအတွက် သုံးရေ ဆီး ၁ မျိုးနန့် တုပ်ကွေးဖျားမှာ သုံးရေ ဆီး ၁ မျိုးကို ရောပနာ ထိုးပလိုက်တေမှာ၊ ၄၈ နာရီအတွင်း ယင်းလူနာမှာ ကိုရိုနာဗိုင်းရာ့ဆ် လုံးဝ ပျောက်လားရေလို့ ဆိုပါရေ။ ပထမ အိပ်ချ်အိုင်ဗွီ ဆီး ၁ မျိုးတည်းနန့် ကုနိန်စွာက၊ အခြေအနေ ဆိုးလာလို့ တုပ်ကွေးဆီးနန့် ရောသုံးစွာလို့ ဆိုပါရေ။
နောက်ဆုံး ဓါတ်ခွဲခန်း အဖြေအရ၊ ယင်းလူနာ အသက်ရှူလမ်းကြောင်းမှာ ကိုရိုနာဗိုင်းရာ့ဆ်ကို လုံးဝ မတွိရဗျာလ်လို့ ဆိုပါရေ။
တရုတ်နိုင်ငံ ဘေဂျင်းမြို့တော်က ဆရာဝန်တိလည်း အယင်ကပင် ကိုရိုနာဗိုင်းရာ့ဆ် အကူးခံရရေ လူနာတိကို အိပ်ချ်အိုင်ဗွီ(HIV) နန့် အဲ့ဆ်(AIDs) ရောဂါတိမှာ သုံးရေ ယင်းဆီးတိနန့် ကုသနိန်ကတ်တေလို့ ဆိုပါရေ။ ယကေလည်း အဂုပိုင် အအောင်မြမြင် အပြတ် ကုနိုင်ရေလို့ မကြေငြာဖူးပါ။