အေသောက်ကြာနိမှာ တရုတ်နိုင်ငံတခုတည်းမှာ လူပေါင်း ၈၆ ယောက်ထိ ကိုရိုနာဗိုင်းရာ့ဆ်နန့် ထပ်သီရေအတွက်၊ အဂုဆိုကေ ကိုရိုနာဗိုင်းရာ့ဆ်နန့်သီရေ လူပေါင်း ၇၂၄ ယောက်ထိ ရောက်လာပါရေ။ တကဗာလုံးမှာ ကိုရိုနာဗိုင်းရာ့ဆ် ကူးစက်ခံရရေ လူပေါင်းလည်း ၃၄,၈၈၆ ကျော်ထိ တက်လာပါရေ။ ကူးစက်ခံရရေ နိုင်ငံ၊ ဒေသပေါင်း ၂၈ နိန်ရာထိလည်း တက်လာပါရေ။
ဂျပန်နိုင်ငံ ယိုကိုဟားမားကမ်းခြေမှာ ရပ်ထားရေ စိန်မင်းသမီး(Diamond Princess)ဇိမ်ခံသင်္ဘောမှာလည်း ကိုရိုနာဗိုင်းရာ့ဆ် ကူးခံရရေ လူပေါင်း ၆၄ ယောက်ထိ ရှိလာပါရေ။
ပထမဆုံးအကြိမ် အသက် ၆၀ အရွယ် အမေရီကန်နိုင်ငံသားတယောက် တရုတ်နိုင်ငံ ဝူဟန်းမြို့မှာ ကိုရိုနာဗိုင်းရာ့ဆ်နန့် ဗြီးခရေ ကြာပဒီးနိက သီလားပါရေ။ ဂျပန်လူမျိုးတယောက်လည်း ဝူဟန်းမြို့မှာဗျာလ် ကိုရိုနာဗိုင်းရာ့ဆ်နန့် အေစနီနိ သီလားပါရေ။
ကိုရိုနာဗိုင်းရာ့ဆ်ကို အဂုထိ မထိန်းချုပ်နိုင်သိမ့်ရေအတွက်၊ အဂုအခါ ကဗာတဝှမ်းက တရုတ်နိုင်ငံကို အမှီပြုနိန်ရရေ စီးပွားရေးလုပ်ငန်းတိ ရပ်ဆိုင်းရရေ အခြေအနေထိ ရောက်လာပါရ။ ကဗာ့အကြီးဆုံး ကားထုတ်လုပ်တေ ဟင်းဒေမိုတွာ(Hyundai Motor)ကင်ပဏီကြီးလည်း တရုတ်နိုင်ငံက တင်သွင်းနိန်ရရေ ကားဝါယာနန့် ဆက်စပ်ပစ္စည်းတိ ရောက်မလာရေအတွက်၊ တောင်ကိုးရီးယားနိုင်ငံက ကားထုတ်လုပ်တေ စက်ရုံကို ရပ်လိုက်ရပါရေ။
ဖီးယတ် ခြစ်ဆလာ အော်တိုမိုဘဲဆ်(Fiat Chrysler Automobiles)ကလည်း လာဖို့ ၂ ပတ်နန့် ၄ ပတ်အတွင်းမှာ ဥရောပက စက်ရုံတိကို ပိတ်လားဖို့လို့ အသိပီးထားပါရေ။
ကိုရိုနာဗိုင်းရာ့ဆ်စွာ ကဗာတဝှမ်းက လူတိ အသက်ကို ခြိမ်းခြောက်နိန်ရေပိုင်၊ လူတိအတွက် မရှိမဖြစ် လိုအပ်တေ စီးပွားရေးနန့် အလုပ်အကိုင်အခွင့်အရေးတိကိုလည်း တစတစ ခြိမ်းခြောက်လာနိန်ပါရေ။ အေဗိုင်းရာ့ဆ်ကို ထိန်းချုပ်ဖို့ အချိန်ကြာလာလီ၊ ကဗာ့စီးပွားရေးကို ထိခိုက်လာလီ ဖြစ်တေအတွက်၊ လူတိုင်းအတွက် မသေချာ မရေရာရေ အနာဂတ်ကို ဖြစ်လာနိုင်ဇီပါရေ။ အားလုံး သတိထားပြင်ဆင်ထားကတ်ဖို့ လိုပါရေ။