ကိုရိုနာဗိုင်းရာ့ဆ်စွာ ကျန်းမာရေးစနစ် အားနည်းရေ နိုင်ငံတိကို “ကကောင်း ပျက်စီးကတ်ဆိုက်လားအောင်ထိ ဖန်တီးနိုင်ရေ” လို့ ကဗာ့ကျန်းမာရေးအဖွဲ့ ညွှန်ချုပ် တီဒြိုဆ် အတ်ဟာနွင်းမ် ဂီဘြီရီဆာ့ဆ်(World Health Organization Director-General Tedros Adhanom Ghebreyesus)က သတိပီးလိုက်ပါရေ။ ယင်းအတွက်နန့် ပိုချမ်းသာရေနိုင်ငံတိက ကျန်းမာရေးစနစ် အားနည်းရေနိုင်ငံအတွက်၊ ကြိုတင်ပြင်ဆင်မှုတိမှာ ရင်းနှီးမြှပ်နှံပနာ ကူညီပီးကတ်ဖို့ တိုက်တွန်းလိုက်ပါရေ။
“ကျွန်တော် အစိုးရိမ်ဆုံးက၊ အေဗိုင်းရာ့ဆ်က ကျန်းမာရေးစနစ်အားနည်းရေ နိုင်ငံတိကို ကကောင်းကြီး အပျက်အစီးကတ်ဆိုက်လားအောင် ဖန်တီးလားဖို့စွာပါ။” လို့ ပြောလားပါရေ။
“အစိုးရတိက ကြိုတင်ကာကွယ်မှု လုပ်ပနာ တားဆီးစွာက၊ လုံးဝ မဖြစ်နိုင်လို့ ဆိုလိုစွာ မဟုတ်။ ဖြစ်နိုင်သိမ့်ရေ။”လို့လည်း ပြောလားပါရေ။
အေနိမိုးသောက်ဖက်ကလည်း ကိုရိုနာဗိုင်းရာ့ဆ်စွာ တရုတ်နိုင်ငံအတွက် “ကကောင်း အရေးပေါ် အနိန်အထား” ရောက်နိန်ပနာ၊ တကဗာလုံးအတွက် သီရေးရှင်ရေး ခြောက်လန့်မှုတခုအနိန်နန့် ရှိနိန်သိမ့်ရေလို့ ရွီးလားပါရေ။
အဂုကိုရိုနာဗိုင်းရာ့ဆ်ကို COVID-19 လို့ နာမေပီးသင့်ပနာ၊ ကာကွယ်ဆီးကိုတော့ နောက် ၁၈ အတွင်းမှာ ရလာနိုင်ရေလို့ ယင်းသူက ပြောလားပါရေ။
အေနိ ဆွစ်ဇာလန်နိုင်ငံ ဂျီနီဗာမြို့(Geneva) အစည်းအဝေးမှာတော့ခါ၊ တရုတ်နိုင်ငံမှာ ကိုရိုနာဗိုင်းရာ့ဆ်ကုသဖို့အတွက် ဆီးတမျိုးကို စမ်းသပ်ကုသနိန်ဗျာလ်လို့ ကဗာ့ကျန်းမာရေးအဖွဲ့ အမှုဆောင်ညွှန်မှူး(executive director of the World Health Organization) ဒေါင်တာ မိုင်ကယ်လ် ဂျေ၊ ရိုင်ယန်(Dr. Michael J. Ryan)က ပြောလားပါရေ။