အေနိ ဥရောပတိုက်မှာ ကိုဗဲ့ဒ်-၁၉ (Covid-19) ကိုရိုနာဗိုင်းရာ့ဆ်နန့် သီရေလူ စုစုပေါင်း အရေအတွက်က၊ မူလ စဖြစ်ခရေ အာရှတိုက်မှာ သီရေလူ စုစုပေါင်း အရေအတွက်ကို ကျော်လားပါဗျာလ်။ လူအများဆုံး သီရေ တရုတ်နိုင်ငံမှာ ကိုရိုနာဗိုင်းရာ့ဆ်ကို ထိန်းလို့ရသလောက် ဖြစ်နိန်ကေလည်း၊ အနောက်နိုင်ငံတိမှာတော့ ဖရိုဖရဲနန့် တိုက်ဖျက်နိန်ရပနာ၊ ကူးစက်ပြန့်ပွားရေနှုန်း၊ သီရေနှုန်းတိကလည်း တရိပ်ရိပ် မြင့်တက်လာနိန်ပါရေ။
အေနိ နိန့်ခင်းဖက်ထိ၊ ဥရောပမှာ သီရေ လူပေါင်း ၃,၄၂၁ ယောက် ရှိလာရေအတွက်၊ အာရှတိုက်မှာ သီရေ လူပေါင်း ၃,၃၈၄ ယောက် ကို ကျော်တက်လားပါဗျာလ်။ တကဗာလုံးမှာ သီရေ လူပေါင်းလည်း ၈,၀၀၀ အထက်ကို ရောက်လားပနာ၊ ကူးစက်ခံရရေ လူပေါင်းလည်း ၂ သိန်း အထက်ကို ရောက်လားပါဗျာလ်။
လွန်ခရေ ၁၂ ရက်အတွင်းမှာ ၂ ဆ တိုးလားစွာပါ။
အဂုအခါ ဥရောပတိုက်စွာ၊ တကဗာလုံးကို ကိုရိုနာဗိုင်းရာ့ဆ် ကူးစက်ပြန့်ပွားရေ ဗဟိုချက်မလည်း ဖြစ်လာနိန်ပါရေ။ အီတလီနိုင်ငံစွာ ကဗာမှာ ဒုတိယအဆိုးရွားဆုံး ကူးစက်ခံနိန်ရရေ နိုင်ငံဖြစ်လာပနာ၊ လက်ရှိမှာ ကူးစက်ခံနိန်ရရေ လူပေါင်း ၃၀,၀၀၀ ကျော်နန့်၊ သီရေ လူပေါင်းလည်း ၂,၅၀၀ ကျော်လားပါဗျာလ်။ ပိုဆိုးစွာက အီတလီမှာ သီရေနှုန်းထားက၊ တရုတ်နိုင်ငံထက် ပိုများနိန်စွာပါ။ နောက်တခု ပိုဆိုးစွာက အီတလီနိုင်ငံစွာ၊ ဂျပန်နိုင်ငံဗြီးကေ၊ ကဗာမှာ သက်ကြီးရွယ်အိုတိ အများဆုံး ရှိရေ နိုင်ငံပါ။ ကိုရိုနာဗိုင်းရာ့ဆ်နန့် သီရေ လူအများစုစွာလည်း အသက် ၇၀ အထက်တိ၊ ပိုဖြစ်နိန်ပါရေ။
