အေနိ အီတလီနိုင်ငံမှာ ကိုဗဲ့ဒ်-၁၉(Covid-19) ကိုရိုနာဗိုင်းရာ့ဆ်နန့် အေနိတရက်တည်းမှာ သီရေလူ အရေအတွက် ၇၉၃ ထိ စံချိန်တင် တက်လာပနာ၊ စုစုပေါင်း သီရေလူ အရေအတွက် ၅,၀၀၀ နားကို ကတ်လာဗျာလ်လို့ ကျန်းမာရေးအာဏာပိုင်တိက ပြောလားပါရေ။
အယင်လကမှ စပနာ ပြန့်ပွားလာရေ အေဗိုင်းရာ့ဆ်နန့်၊ အေနိတရက်တည်းမှာ သီရေ လူပမာဏက နောက်ထပ် ၂၀% လောက် ထပ်ပနာ မြင့်တက်လာစွာပါ။
ခေတ်အဆက်ဆက် ကျော်ကြားလာရေ ရောမအင်ပါယာကြီးဗဟိုဌာနီမှာ၊ ကိုရိုနာဗိုင်းရာ့ဆ်နန့် ၁ လအတွင်း လူစုစုပေါင်း ၄,၈၂၅ ယောက် သီလားပါဗျာလ်။ မူလစပြန့်ပွားခရေ တရုတ်နိုင်ငံမှာ သီရေလူ စုစုပေါင်း အရေအတွက်ကိုလည်း ကျော်လွန်လားပါဗျာလ်။
အေနိ အီတလီနိုင်ငံမှာ ကိုရိုနာဗိုင်းရာ့ဆ် ကူးစက်ခံရရေ လူပေါင်း ၅၃,၅၇၈ ယောက်ကို တက်လာပါရေ။ ညဇာခ ရှိခရေ ၄၇,၀၂၁ ယောက်ထက်၊ နောက်ထပ် လူ ၅,၀၀၀ လောက် တရက်တည်းမှာ ထပ်အကူးခံရစွာပါ။
အီတလီနိုင်ငံက အဆိုးရွားဆုံး ပြန့်ပွားနိန်ရေ လုံဘာဒီဒေသ(Lombardy)မှာ ၂၅,၅၁၅ ယောက် ကူးစက်ခံထားရပနာ၊ လူပေါင်း ၃,၀၉၅ ယောက် သီလားပါဗျာလ်။ အခြေအနေ ကကောင်းဆိုးရွားနိန်လို့၊ မီးသင်္ဂြိုလ်စက်တိ ၂၄ နာရီ လည်ပတ်နိန်စွာတောင်၊ အလောင်းတိ အသုဘခန်းမတိမှာ စုပြုံထပ်နိန်ပနာ၊ နောက်ထပ် ထားစရာမရှိလို့ စစ်တပ်ကားတိနန့် ဘာဂါမိုမြို့(Bergamo)နန့် တခြားမြို့တိက မီးသင်္ဂြိုလ်စက်တိကို သယ်ထုတ်နိန်ရပါရေ။
၆,၀၇၂ ယောက် ပြန်ကောင်းလားဗျာလ်လို့ ဆိုပါရေ။ အယင်နိကထက် လူပေါင်း ၉၄၃ ယောက် ပြန်ကောင်းလာစွာပါ။ ယကေလည်း ၂,၈၅၇ ယောက်က အရေးပေါ်ခန်းထဲမှာ ရှိနိန်သိမ့်ရေလို့ ဆိုပါရေ။
မာ့ချ်လ ၁၂ ရက်နိကပင် အီတလီ တနိုင်ငံလုံးကို အိမ်ပြင်ထွက်ခွင့် ပိတ်ပင်ထားပါရေ။
မှတ်ချက် – အီတလီနိုင်ငံစွာ ကဗာမှာ ဂျပန်နိုင်ငံဗြီးကေ၊ ဒုတိယ အသက်အကြီးပိုင်းတိ အများဆုံးရှိရေ နိုင်ငံပါ။ ကျန်းမာရေး နည်းပညာမြင့်မားမှုနန့် စောင့်ရှောက်မှု ကကောင်း ကောင်းလို့ အသက်ရှည်ကတ်စွာပါ။ ယကေလည်း ကိုရိုနာဗိုင်းရာ့ဆ် ကူးစက်မှုက ကကောင်းယင်ရေခါ၊ ယလောက် အဆင့်မြင့် ကျန်းမာရေးအထောက်အကူပြုကရိယာတိ ရှိနိန်ကေလည်း၊ ရှိနိန်ရေ အရေအတွက်နန့်၊ ဆေးရုံကို ရောက်လာရေ လူပမာဏက လုံးဝ မမျှ ဖြစ်လားပါရေ။ လူတိုင်းကို မကုသနိုင်ဘဲ၊ အချိန်တိုအတွင်းမှာ တဘိုင်းဘိုင်း သီလားကတ်ရပါရေ။