အေနိ ကဗာမှာ ကိုရိုနာဗိုင်းရာ့ဆ် ကူးစက်ခံရရေ နိုင်ငံပေါင်း ၁၉၈ နိုင်ငံနန့်၊ လူပေါင်း ၅၂၉,၁၃၂ ယောက် ရှိလာပါရေ။ အများဆုံး ကူးစက်ခံရရေနိုင်ငံက၊ တရုတ်နိုင်ငံကို ကျော်ပနာ၊ အမေရီကန်ပြည်ထောင်စု ဖြစ်လာပါရေ။ အဂုအချိန်ထိ တရုတ်နိုင်ငံမှာ ကူးစက်ခံရရေ လူပေါင်း ၈၁,၂၈၅ ယောက် ရှိနိန်ပနာ၊ အမေရီကန်ပြည်ထောင်စုမှာ လူပေါင်း ၈၃,၀၉၇ ယောက် ရှိလာပါရေ။ အမေရီကန်ပြည်ထောင်စုမှာ လွန်ခရေ ၂၄ နာရီအတွင်း၊ လူပေါင်း ၁၄,၈၈၆ ယောက် ကူးစက်ခံလာရပါရေ။
တတိယ ကူးစက်မှု အများဆုံးနိုင်ငံက အီတလီနိုင်ငံ ဖြစ်နိန်ပနာ၊ လူပေါင်း ၈၀,၅၈၉ ယောက် အကူးခံထားရပါရေ။ လွန်ခရေ ၂၄ နာရီအတွင်း လူပေါင်း ၆,၂၀၃ ယောက် အကူးခံရရေအတွက်၊ အေနှုန်းလောက်နန့်ရာ ကူးစက်နိန်ကတ်ဖို့ဆိုကေ၊ နောက် ၂၄ နာရီမှာ တရုတ်နိုင်ငံကို ကျော်လားနိုင်ပါရေ။
ကဗာမှာ လူသီမှု အများဆုံးနိုင်ငံက အီတလီနိုင်ငံ ဖြစ်နိန်ပနာ၊ လွန်ခရေ ၂၄ နာရီမှာ လူပေါင်း ၇၁၂ ယောက် သီလားရေအတွက်၊ စုစုပေါင်း လူသီရေ အရေအတွက် ၈,၂၁၅ ယောက် ရှိလာပါရေ။ ဒုတိယ လူသီမှု အများဆုံးနိုင်ငံက ဆပိန်နိုင်ငံပါ။ လွန်ခရေ ၂၄ နာရီအတွင်းမှာ၊ လူသီမှု ၇၁၈ ယောက် ရှိခပနာ၊ စုစုပေါင်း ၄,၃၆၅ ယောက်ကို တက်လာပါရေ။ တတိယ လူသီမှု အများဆုံး တရုတ်နိုင်ငံမှာ၊ လူပေါင်း ၃,၂၈၇ ယောက် သီထားပါရေ။
အဂုအချိန်ထိ ကိုရိုနာဗိုင်းရာ့ဆ်နန့် သီရေလူပေါင်း ၂၃,၉၆၃ ယောက် ရှိလာပနာ၊ သီရေ ပမာဏက တရက်ထက်တရက် အထက်ကို တရိပ်ရိပ် ထောင်တက်လာစွာကို စိတ်မကောင်းစရာ တွိနိန်ရပါရေ။
အသက်အရွယ်အလိုက် သီရေ နှုန်းထားကတော့၊ အသက်ကြီးလာလီ အေဗိုင်းရာ့ဆ်နန့် သီဖို့ အခွင့်အရေး ပိုများလီဆိုစွာ အောက်က ဇယားမှာ တွိနိုင်ပါရေ။
ယောက်ကျ်ား(Male)၊ မမက်(Female) သီရေနှုန်းကိုလည်း အောက်ကဇယားမှာ တွိနိုင်ပါရေ။
သီရေ လူတိ၊ ရောဂါအခံကို ခွဲခြားကြည့်လိုက်တေခါ ရလာရေ ရာခိုင်နှုန်းကို အောက်မှာ တွိရပါရေ။
Cardiovascular disease – နှလုံးရောဂါ, Diabetes – ဆီးချိုရောဂါ, Chronic respiratory disease – နာတာရှည် အဆုတ်ရောဂါ, Hypertension – သွီးတိုးရောဂါ, Cancer – ကန်ဆာရောဂါ, no pre-existing conditions – ရောဂါအခံ မရှိ