လွန်ခရေ နှစ် နှစ်ကုန်ပိုင်းလောက်ကပင် ကိုဗဲ့ဒ်-၁၉(Covid-19) ကိုရိုနာဗိုင်းရာ့ဆ်နန့် တရက်တရက်ကို တဘိုင်းဘိုင်းနန့် လူသီနိန်ခရေ တရုတ်နိုင်ငံမှာ၊ ပထမဆုံးအကြိမ်အဖြစ် လူမသီရေ နိစွာ လွန်ခရေ ၂၄ နာရီမှာ ရှိလာပါရေ။
လွန်ခရေ တနင်္လာနိမှာ လူသီမှု လုံးဝ မရှိခဘဲ၊ ကူးစက်ခံရရေ လူ ၃၂ ယောက်ရာ ရှိခပနာ၊ ယင်း ၃၂ ယောက်လုံးစွာလည်း၊ ပြည်ပနိုင်ငံတိက ပြန်သယ်လာရေ ကူးစက်မှုတိရာ ဖြစ်တေလို့ တရုတ်နိုင်ငံ အမျိုးသား ကျန်းမာရေး ကော်မရှန်(National Health Commission)က ပြောလားပါရေ။
တရုတ်နိုင်ငံက ဝူဟန်းဒေသကို ၇၆ ရက်လောက် လုံးဝ အလားအလာ ပိတ်ပင်ခဗြီးရေနောက်မှာ၊ အဂု တစတစနန့် ပြန်ဖွင့်ပီးလာပါဗျာလ်။ နက်ဖြန်ခါဆိုကေ ဝူဟန်းမြို့ကနိန် အပြင်လားဖို့ ခရီးစဉ်တိအားလုံးကို ပြန်ဖွင့်ပီးလားဖို့လို့ ဆိုပါရေ။
အဂုအခါ တရုတ်နိုင်ငံကို ပြန်လာရေ လူတိရာ ကိုရိုနာဗိုင်းရာ့ဆ်ကို ပြန်သယ်လာကတ်တေအတွက်၊ ဒုတိယလှိုင်းပိုင် ကိုရိုနာဗိုင်းရာ့ဆ် ပြန်ပြန့်ပွားဖို့စွာကို ကြောက်တေအတွက်၊ ပြည်ပက ဝင်လာဖို့ နယ်စပ်ဂိတ်တိနန့် လေယာဉ်ခရီးစဉ်တိအားလုံးကို တရုတ်နိုင်ငံက ပိတ်ပင်ထားပါရေ။
အဂု ကိုရိုနာဗိုင်းရာ့ဆ် အပြန့်ပွားဆုံးနိန်ရာက အမေရီကန်ပြည်ထောင်စု ဖြစ်နိန်ပနာ၊ ဥရောပနိုင်ငံတိက ဒုတိယအများဆုံး နိုင်ငံတိထဲမှာ တန်းစီနိန်ပါရေ။ တကဗာလုံးမှာ ကူးစက်ခံရရေ လူပေါင်း ၁.၃ သန်းကျော်နန့်၊ သီဆုံးလားရေ လူပေါင်းလည်း ၇ သောင်း ၆ ထောင်နီးပါး ရှိနိန်ပါဗျာလ်။
တရုတ်နိုင်ငံမှာ ကူးစက်ပြန့်ပွားမှု ကကောင်း ကျဆင်းလားဗျာလ်ဖြစ်တေအတွက်၊ အဂုအခါ တရုတ်နိုင်ငံက တခြားကူးစက်ပြန့်ပွားနိန်ရေ နိုင်ငံတိအတွက်၊ မျက်နှာဖုံးတိအပါအဝင်၊ ကျန်းမာရေး ဆီးဝါးကရိယာတိကို ဒေါ်လာ ၁.၅ ဘီလီယံ ကျော်အထိ ရောင်းချပနာ ဖြန့်ဖြူးပီးနိန်ပါရေ။
အေနိအထိ ကဗာ့နိုင်ငံပေါင်း ၁၈၀ ကျော်မှာ ကိုရိုနာဗိုင်းရာ့ဆ် ကူးစက်ပြန့်ပွားမှုကို ခံနိန်ရတုန်းပါ။ အေကူးစက်ရောဂါက ကာကွယ်ဆီး ထုတ်နိုင်ရေ အချိန်အထိ ကဗာ့မျက်နှာပြင်ထက်မှာ ရှိနိန်ဖို့ ဖြစ်ပနာ၊ ယင်းအချိန်က အနည်းဆုံး ၁ နှစ် ခွဲ လောက် ကြာဖို့သိမ့်လို့ သိပ္ပံပညာရှင်တိက သုံးသပ်ထားကတ်ပါရေ။