အမေရီကန်ပြည်ထောင်စု သမ္မတ ဒိုနဲလ် ထရင့်ပ် နန့် ကြင်ဖော် ဖက်ဆ်လေဒီ မီလေးနီးယား ထရင့်ပ် နှစ်ယောက်လုံးမှာ ကိုဗဲ့ဒ် အကူးခံထားရစွာကို တွိရရေလို့၊ အနားကပ် အကြီးတန်း လက်ထောက်တယောက်မှာ ကိုဗဲ့ဒ် အကူးခံရလို့ နိန်မကောင်း ဖြစ်လာရေ နောက်ပိုင်း၊ ဆီးစစ်ကြည့်စွာမှာ သိရရေလို့ သတင်းထုတ်ပြန်လာပါရေ။
“အေနိညဉ့် ကျွန်တော်နန့် ဖက်ဆ်လေဒီ နှစ်ယောက်လုံးမှာ ကိုဗဲ့ဒ်-၁၉ တွိရပါရေ။ ကျွန်တော်ရို့ တခြားလူတိနန့် ကူးလူးဆက်ဆံမှု မလုပ်ဘဲ သီးသန့် ခွဲနိန်ပနာ၊ ပြန်ကျန်းမာလာအောင် ချက်ချင်း လုပ်လားပါဖို့။ ကျွန်တော်ရို့ အေရောဂါကို အတူတူ ကျော်ဖြတ်လားပါဖို့။” လို့ သမ္မတက တွယ်တာမှာ ရွီးလားပါရေ။
ဖက်ဆ်လေဒီကတော့ “နှစ်ယောက်လုံး ကျန်းကျန်းမာမာပါ။ အားလုံး ကိုယ့်စွာကိုယ် လုံခြုံအောင် ဂရုစိုက်ကတ်ဖို့ တိုက်တွန်းပါရေ။ အကျွန်ရို့ အားလုံး အေရောဂါကို အတူတူ ကျော်ဖြတ်လားကတ်ပါမေ။” လို့ တွယ်တာမှာ ရွီးလားပါရေ။
ထရင့်ပ် အနီးကပ် အကြီးတန်း လက်ထောက် ဟုပ် ဟဲ့ခ်ဆ် (Hope Hicks)မှာ ကိုရိုနာဗိုင်းရာ့ဆ်ကို တွိရဗြီးလို့ မကြာခင်မှာ အေသတင်းကို ထုတ်ပြန်လာစွာပါ။ ယင်းကလိမ့်မေက သမ္မတနန့် အတူတူ ဗြီးခရေ အင်္ဂါနိက ဂျိုး ဘိုင်ဒန် နန့် သမ္မတလောင်း စကားရည်လုပွဲ၊ ဗုဒ္ဓဟူးနိမှာ သမ္မတနန့် လေယာဉ်ပျံ အတူတူ စီးပနာ မီနီဆိုတာပြည်နယ် မဲဆွယ်ပွဲ၊ အစရှိပနာ တပူးတွဲတွဲ ဒေါက်ချောက် ခရီးအတူတူ လားနိန်ခစွာပါ။
“အေအချိန်ထိ နှစ်ယောက်လုံး ကျန်းကျန်းမာမာပါ။ အိမ်ဖြူတော်ထဲက အိမ်ထဲမှာပဲ ပြန်ကျန်းမာလာအောင်ထိ နိန်ထိုင်လားကတ်ဖို့ စီစဉ်နိန်ပါရေ။” လို့ ထရင့်ပ် သမားတော် ချွင် ကင်လေး(Sean Conley)က ပြောလားပါရေ။
