ကိုရိုနာဗိုင်းရာ့ဆ် A သွီးအုပ်စုက အသက်ရှူကျပ် အဖြစ်နိုင်ဆုံးလို့ တွိ

FILE PHOTO: A health worker stands by test tubes with blood at a temporary Covid-19 testing station in Torrejon de Ardoz, Spain, on May 29, 2020. © Reuters / Susana Vera
FILE PHOTO: A health worker stands by test tubes with blood at a temporary Covid-19 testing station in Torrejon de Ardoz, Spain, on May 29, 2020. © Reuters / Susana Vera

ကိုရိုနာဗိုင်းရာ့ဆ် အကူးခံရကေ အသက်ရှူကျပ်လို့ သီနိုင်ရေဆိုစွာ ယင်းလူတိ သွီးအမျိုးအစားနန့် ဆက်စပ်နိန်ရေဆိုစွာကို ပထမဆုံးအကြိမ် သွီးအုပ်စု ခွဲကြည့်ရေ သုတေသနတခုမှာ တွိလာရပါရေ။ အေဟင့်က မျိုးရိုးဗီဇစွာ အရေးပါရေ ကဏ္ဍမှာ ရှိနိန်စွာကို ပြသပါရေ။

‘The ABO blood group locus and a chromosome 3 gene cluster associate with SARS-CoV-2 respiratory failure in an Italian-Spanish genome-wide association analysis’ လို့ နာမေပီးထားရေ သုတေသနက မျိုးရိုးဗီဇပစ္စည်း ဆက်စပ်စွာကို ကျယ်ကျယ်ပြန့်ပြန့် လေ့လာစွာ(genome-wide association study (GWAS)) သုတေသန တမျိုးပါ။

အေ GWAS က လူတယောက်ခန္ဓာကိုယ်ထဲက မျိုးရိုးဗီဇတိထဲမှာ ပြန့်နှံ့နိန်ရေ မျိုးရိုးဗီဇ ဒီအမ်အေ လုပ်တေပစ္စည်းတိ(DNA markers)နန့်၊ ယင်းလူ ရုပ်ပိုင်းဆိုင်ရာ (ဝါ) စိတ်ပိုင်းဆိုင်ရာနန့် ဇာပိုင် ဆက်စပ်နိန်လဲဆိုစွာကို လေ့လာကြည့်စွာပါ။ အဂု လေ့လာကြည့်စွာမှာ ကိုဗဲ့ဒ်-၁၉(Covid-19) ကူးစက်ခံရရေ လူတချို့ အသက်ရှူကျပ်ကတ်စွာရေ သွီးအမျိုးအစားနန့် ဆက်စပ်နိန်ရေဆိုစွာကို တွီရစွာပါ။

တခု သတိထားရဖို့စွာက GWAS က ဆက်စပ်မှုကို လေ့လာရေ သုတေသနတမျိုးပါ။ GWAS က ဖြစ်ရရေ အကြောင်းရင်းကို လေ့လာရေ သုတေသနမျိုး မဟုတ်ပါ။ ယင်းအတွက်နန့် ဆက်စပ်မှုအများကြီးကို လုပ်နိုင်မှရာ အဖြေမှန်နန့် နီးစပ်နိုင်ပါရေ။

ယကေလည်း အေသုတေသနက ကိုဗဲ့ဒ်-၁၉ နန့် မျိုးရိုးဗီဇ ဆက်စပ်နိုင်ရေဆိုစွာကို အများကြီး မီးမှောင်းထိုးပြလာပါရေ။

ဇာသွီးအမျိုးအစားက အကောင်းဆုံးလဲ?

အေသုတေသနက ဗီဇပြောင်းလဲမှု ၈ သန်းခွဲလောက်နန့်၊ ဆပိန်လူမျိုး(Spaniards) ၁,၇၂၅ ယောက်၊ ကိုရိုနာဗိုင်းရာ့ဆ် အဖြစ်များရေ ဒေသ ၇ ခု(Milan, Monza, Madrid, San Sebastian, and Barcelona)က အီတလီလူမျိုး ၂,၀၉၀ ယောက်ရို့ကို လေ့လာခပါရေ။ တခြားနိုင်ငံတိက ပြောင်းလာရေ လူတိကိုတော့ခါ မျိုးရိုးဗီဇ မရောထွီးလားအောင်လို့ လေ့လာမှုမှာ မထည့်ခပါ။

အေသုတေသနမှာ ကိုဗဲ့ဒ်-၁၉ ရာ အကူးခံရကေ၊ အေ အပေါင်း(A-positive blood) သွီးအမျိုးအစားစွာ အသက်ရှူကျပ်ဖို့ ဖြစ်နိုင်ခြေ အန္တရာယ်အများဆုံး ရှိနိန်ပနာ၊ အို(O blood) သွီးအမျိုးအစားက ဗိုင်းရာ့ဆ် အန္တရာယ်က အကာကွယ်နိုင်ဆုံး ဖြစ်နိန်စွာကို တွိရရေလို့ ဆိုပါရေ။ စစ်ဆေးကြည့်သမျှ အုပ်စုတိုင်းကို သွီးအုပ်စုအလိုက် ခွဲကြည့်ရေခါ အေအဖြေကို တွိရရေပိုင်၊ ဆပိန် တအုပ်စုတည်း(Spain-only)၊ အီတလီ တအုပ်စုတည်း(Italy-only) ခွဲကြည့်ရေခါလည်း အေအဖြေကို တွိရရေလို့ ဆိုပါရေ။

အဂုတော့ ဥရောပတိုက် တခုလုံးမှာ နိုင်ငံအသီးသီးက လူတိကို သွီးအုပ်စုအလိုက် ခွဲပနာ ဆက်လေ့လာကြည့်ကတ်ဖို့ တိုက်တွန်းနိန်ကတ်ပါရေ။