၂၀၁၇ ခုနှစ်၊ နိုဗန်ဘာ ၁၃ ရက် – ကဗာ့ဂျုံစျီးကွက်မှာ အမေရီကန်တိ ကြီးစိုးထားစွာကနိန် ရာရှားက အစားထိုး နိန်ရာယူလားပါဗျာလ်။ ရာရှားက တင်ပို့ရေ ဂျုံစျီးကွက် ကကောင်းကြီး ကြီးထွှားလာနိန်ရေ အကြောင်းရင်းက ရာရှားဖေ့သာတန်ဖိုး ကျဆင်းလားစွနန့် စိုက်ပျိုးရေးမှာ ရင်းနှီးမြှပ်နှံမှု များလာလို့ ဖြစ်ပါရေ။
“တချို့ စျီးကွက်တိမှာ ရာရှားက အမေရီကန်တိကို ဘေးကို တွန်းထုတ်လိုက်ပါဗျာလ်။ အေပိုင်စွာမျိုးကို ကျွန်တော်ရို့ ကကောင်း ကျေနပ်ပါရေ။” လို့ ရာရှား စိုက်ပျိုးရေဝန်ကြီး အလက်စန္ဒြာ တက်ရှိဗ် က ပြောပါရေ။
အေနှစ်အတွက် ရာရှားဂျုံထုတ်လုပ်မှုစွာ နှစ် ၁၀၀ ကျော်အတွင်းမှာ အများဆုံး ဖြစ်လာပါဖို့။ အနည်းဆုံး တန်ချိန် ၈၃ သန်း ရှိဖို့လို့ ဝေါလ် ဆထြိ ဂျာနယ်(Wall Street Journal)က ခန့်မှန်းထားပါရေ။ ရာရှားနိုင်ငံ အခြေစိုက် အတိုင်ပင်ခံ ပြိုဇာနို(ProZerno)ကတော့ခါ တန်ချိန် သန်း ၁၃၀ ကျော်ဖို့လို့ ပြောပါရေ။ အေပမာဏစွာ ၁၉၇၆ ခုနှစ် ရာရှား – အာဖဂန် စစ်ပွဲ မဖြစ်ခင် ထုတ်ခရေ စံချိန်ထက် ၂.၆% ပိုပါရေ။
“အေနိန့် ကျွန်တော်ရို့ ဂျုံကို သင့်တင့်မျှတရေ စျီးနန့် ရောင်းနိုင်ဖို့ ကြိုးစားနိန်ပါရေ။ အဂု တန်ချိန် သန်း ၁၃၀ ရောက်နိန်ပါဗျာလ်။ မကြာခင် တန်ချိန် သန်း ၂၀၀ ထိ တိုးထုတ်လားပါဖို့။ အရေးအကြီးဆုံးက ရောင်းဖို့ စျီးကွက် ရှာဖို့ပါ။” လို့ တက်ရှိဗ် က ပြောပါရေ။
၂၀၁၇ ခုနှစ်မှာ အမေရီကန် ဂျုံထုတ်လုပ်မှုက ကျဆင်းလားဖို့ အခြေအနေ ရှိနိန်ပါရေ။ အမေရီကန်ဂျုံလုပ်ငန်းရှင်အသင်းက ကဗာ့ ဂျုံ အများဆုံး တင်သွင်းရေ အီဂျစ်နိုင်ငံက ရုံးခန်းကိုတောင် ပိတ်ပစ်ရရေ အခြေအနေအထိပါ။
“ပပွင့်လလင်း ပြောဖို့ဆိုကေ ကျွန်တော်ရို့ ရာရှားက တင်ပို့ရေ ဂျုံစျီးနှုန်းကို လုံးဝ မပြိုင်နိုင်ပါ။” လို့ အမေရီကန်ဂျုံလုပ်ငန်းရှင်အသင်း ပြောခွင့်ရ ပုဂ္ဂိုလ် ဆတိဗ် မာစာ က ဝေါလ် ဆထြိ ဂျာနယ်ကို ပြောပြပါရေ။
အမေရိကန်စိုက်ပျိုးရေးဌာန အဆိုအရ ၂၀၁၇ ခုနှစ် ကဗာ့ဂျုံစျီးကွက်မှာ အမေရီကန် ဂျုံတင်ပို့မှုက ၁၅% ရှိရေလို့ ဆိုပါရေ။ လွန်ခရေ ၄ နှစ်က ၃၀% ရှိခစွာက ကျဆင်းလားစွာပါ။
အယင်နှစ်ကပင် ရာရှားစွာ ကဗာ့အကြီးဆုံ ဂျုံ ထုတ်လုပ်တေနိုင်ငံ၊ ဂျုံ အများဆုံး တင်ပို့ရေနိုင်ငံ ဖြစ်ခပါရေ။ စုစုပေါင်း တန်ချိန် ၁၁၉ သန်း ထုတ်လုပ်ခပနာ၊ တန်ချိန် ၃၄ သန်း ပြည်ပကို တင်ပို့ခပါရေ။ အေနှစ်မှာ တန်ချိန် သန်း ၄၀ ထိ တင်ပို့လားဖို့လို့ စိုက်ပျိုးရေးဝန်ကြီးဌာနက ပြောပါရေ။
ကိုးကား – https://www.rt.com/business/409704-russia-wheat-oust-us-egypt/