တောင်ကိုးရီးယားနိုင်ငံ ဆိုးလ်မြို့က Facebook ရုံးချုပ် ရှိမှာ၊ Facebook က အယင် သူရို့ တင်ထားရေ မလုံမလဲ ဓါတ်ပုံတိကို ဖျက်ပလိုက်တေအတွက် တောင်ကိုးရီးယားနိုင်ငံသူတိ အင်္ကျီတိချွတ်ပနာ ဆန္ဒပြကတ်ပါရေ။ “သူရို့ခန္ဓာစွာ လိင်ဖြေဖျော်ဖို့ သုံးစွာ မဟုတ်။” လို့လည်း ဆန္ဒပြရေ ကလိမ့်မေတိက ဆိုပါရေ။
မျက်နှာဖုံးတိ၊ မျက်မှန်ထူတိ တပ်ထားရေ ဖိုင်းယား ဖီမီး အတ်ရှန် (Fire Femi Action) အဖွဲ့ဝင် ယင်းကလိမ့်မေတိစွာ၊ ဗြီးခရေ စနီနိမှာ၊ တောင်ကိုးရီးယားနိုင်ငံမြို့တော် ဆိုးလ်မြို့ ဂါနမ်း ရပ်ကွက် (Gangnam District) က Facebook ရုံးချုပ် ရှိမှာ ဆန္ဒပြခကတ်စွာပါ။
“ငါ့ နို့ကို ပြချင်လို့ ပြချင်စွာကို၊ ဇာဖြစ်လို့ ဖျက်ရလေ?” ဆိုရေ စာတမ်းတိကိုလည်း လက်ထဲမှာ ကိုင်ထားကတ်ပါရေ။ တချို့က “ငါ့ ခန္ဓာစွာ လိင်ဖျော်ဖြေဖို့ အရာဝတ္ထု မဟုတ်။” ဆိုရေ စာတမ်းတိကို ခန္ဓာမှာ ရွီးထားကတ်ပါရေ။
ယင်းပိုင် အထက်အင်္ကျီချွတ် ဆန္ဒပြလို့ မကြာခင်မှာ၊ ရဲတိ ရောက်လာပနာ ပဆိုးတိနန့် ယင်းကလိမ့်မေတိကို ကာထားကတ်ပါရေ။
ဗြီးခရေ မေလမှာ မမက်တိ ရာသီလာစွာကို ဂုဏ်ပြုရေအနိန်နန့် Fire Femi Action အဖွဲ့က ပွဲလုပ်ခကတ်တေအချိန်မှာ၊ မမက်တိ အထက်အင်္ကျီချွတ်ပနာ ရိုက်ထားရေ ဓါတ်ပုံတိကို Facebook မှာ တင်လို့၊ Facebook က သူရို့ ပေါ်လစီကို ချိုးဖောက်တေဆိုပနာ ယင်းဓါတ်ပုံတိကို ဖျက်ပလိုက်ရေအတွက် ဆန္ဒပြကတ်စွာ ဖြစ်ပါရေ။
ဗြီးခရေ တနင်္ဂနိန်နိမှာတော့ခါFacebook Korea က တောင်းပန်စာနန့် တတူတူ၊ ယင်းဖျက်ထားရေ ဓါတ်ပုံတိကို ပြန်တင်ပီးထားစွာကို တွိရပါရေ။
