အေနိန့် ဝါးလ် ဆတြိတ် (Wall Street) က စီအီးအို (CEO) တယောက် ဖြစ်တေ ပီတာ ရှဲ့ဖ် (Peter Schiff) ပြောရေ စကားတိကို နားထောင်ဖြစ်တေ။ ပီတာ ရှဲ့ဖ် ပြောစွာတိထဲမှာ မှတ်သားစရာတိက …
“ အဂု မင်းမှာ ဖေ့သာ မရှိ။ “ ဖေ့သာ ရှိအောင် ဇာပိုင် လုပ်ဖို့လဲ။ ” ဆိုစွာ မင်းမှာ အဖြေ ရှိလာ။ ”
“ အခုခေတ်မှာ ဖေ့သာ ရှိကေ လူတိုင်း သုံးချင်၊ ဝယ်ချင်ကတ်စွာကို တယောက်လည်း တားလို့ မရ။ စီးပွားရေး လုပ်ငန်းရှင်တိက “ လူတိ ဇာလိုချင်နိန်ကတ်လဲ။ ” ဆိုစွာကို အသေးစိတ် လေ့လာကတ်တေ။ အဗြီးကေ လူတိ လိုချင်နိန်ကတ်စွာကို ရအောင် လုပ်ပီးရေ။ ဈီးကို ပိုသက်သာအောင် လုပ်ပနာ၊ အရည်အသွေးကို ပိုကောင်းအောင် မြှင့်ပီးရေ။ ယင်းချင့်နန့် ယင်းလူတိ ချမ်းသာလာရေပိုင်၊ သုံးစွဲရေ လူတိလည်း အရည်အသွေး ပိုမြင့်လာရေ။ ”
“အမေရိကန်အစိုးရ သုံးငွေက ဝင်ငွေထက် ပိုများပနာ ဖေ့သာကို လိုရေပိုင် ရိုက်ထုတ်သုံးနိန်ရေအတွက်၊ တကမ္ဘာလုံးမှာ အခြေခံသုံးစွဲရေ အမေရိကန်ဒေါ်လာတန်ဖိုးစွာ တရက်ရက်မှာ လုံးဝ ပြိုကျလားဖို့။ တကမ္ဘာလုံးမှာ ရှိရေ ဖေ့သာတန်ဖိုးတိ ကပြောင်းကပြန် ဖြစ်လားနိုင်ရေအတွက် အကောင်းဆုံးက ဖေ့သာကို ရွှေတုံး၊ ရွှေပြားတိ အနိန်နန့် စုထားသင့်ရေ။ ”
ပီတာ ရှဲ့ဖ် ဆိုလိုစွာကို ထပ်ရှင်းပြရကေ ….
ချမ်းသာဖို့အတွက် –
၁) စီးပွားရေးဆိုစွာ ကိုယ် လုပ်ချင်စွာ၊ ကိုယ် ကျွမ်းကျင်စွာကို လုပ်စွာမျိုး မဟုတ်ဘဲ၊ သူများတိ လိုချင်စွာတိကို လုပ်ပီးရစွာမျိုးရာဖြစ်တေ ဆိုစွာကို အယင်ဆုံး သဘောပေါက်ပါ။
၂) လူအများစု ဇာလိုချင်နိန်ကတ်လဲ ဆိုစွာကို အသေးစိတ် လေ့လာပါ။
၃) လူများတိ လိုချင်နိန်ကတ်စွာကို ယင်းလူတိ လက်ထဲ ရောက်အောင် လုပ်ပီးပါ။
၄) စျီးကို ပို သက်သာအောင် လုပ်ပနာ၊ အရည်အသွေးကို ပို ကောင်းအောင် မြှင့်ပီးပါ။
အထက်က အချက် ၄ ချက်ကို နားလည်ပနာ၊ လက်တွိ လုပ်နိုင်ကေ ယင်းလူ လုံးဝ ချမ်းသာလာပါဖို့။ ဝယ်ယူသုံးစွဲရေ လူတိ၊ ယင်းပစ္စည်း/ဝန်ဆောင်မှုအတွက် ဘဝ အရည်အသွေး ပိုမြင့်မားလာရေလို့ ခံစားရလီ၊ ယင်းပစ္စည်း/ဝန်ဆောင်မှုကို လုပ်တေ လူက ပိုချမ်းသာလာလီပါ။
စုဆောင်းမှုအတွက် –
ဒေါ်လာအပါအဝင် ငွေကြေးတန်ဖိုးတိက ရုတ်တရက် ထိုးကျလားနိုင်ရေအတွက်၊ ဖေသာ စုချင်ကေ ရွှေသတ္တုကို အတုံး၊ အပြား အနိန်နန့် စုသင့်ရေလို့ ပီတာ ရှဲ့ဖ် က အကြံပီးထားပါရေ။
ကျော်ဝင်းခိုင်