ကဗာ့ကျန်းမာရေးအဖွဲ့ ဒဗြူအိပ်ချ်အိုက တရားဝင်နာမေပီးထားရေ Covid-19 ကိုရိုနာဗိုင်းရာ့ဆ်နန့်၊ အေနိ တရုတ်နိုင်ငံမှာ၊ အယင်နိ သီရေ ပမာဏထက် ၂ ဆလောက် တိုးပနာ၊ နောက်ထပ် လူပေါင်း ၂၅၄ ယောက် သီလားပါရေ။ အဂုဆိုကေ ကဗာတဝှမ်းမှာ ကိုရိုနာဗိုင်းရာ့ဆ်နန့် သီရေ လူပေါင်း ၁,၃၇၀ ယောက်ကို မြင့်တက်လာပါရေ။
တရုတ်နိုင်ငံမှာ ကိုရိုနာဗိုင်းရာ့ဆ် ကူးစက်တေ လူပမာဏ ရွီတွက်ပုံကိုလည်း ပြောင်းလိုက်ပါရေ။ အယင်က ကူးစက်ခံရရေ လူတိပမာဏစွာ ဓါတ်ခွဲခန်းက အဖြေ ထွက်လာစွာကို အခြေခံပနာ ပြောစွာပါ။ အေနိက စပနာ၊ ဓါတ်ခွဲခန်း အဖြေတခုတည်းကို အခြေခံပနာ ပြောစွာမဟုတ်ဘဲ၊ ကိုရိုနာဗိုင်းရာ့ဆ် ကူးစက်ခံရရေ ရောဂါလက္ခဏာ ပြနိန်ရေ လူတိကိုပါ တခါတည်း ထည့်ပနာ ရွီတွက်လိုက်ပါရေ။ ယင်းအတွက်နန့် အေနိတရက်တည်း တရုတ်နိုင်ငံတဝှမ်းမှာ ကူးစက်ခံရရေ လူပေါင်း ၁၅,၁၅၂ ယောက် ရှိရေလို့ ပြောလားပါရေ။ အယင်နိကထက် ၁၀ ဆလောက်ထိ အရေအတွက်က မြင့်တက်လားပါရေ။ အေဟင့်က အထက်မှာ ပြောခရေပိုင် ရီတွက်ပုံ ပြောင်းလိုက်လို့လည်း ပါပါရေ။ ယင်းအတွက်နန့် တရုတ်နိုင်ငံ တခုတည်းမှာ ကိုရိုနာဗိုင်းရာ့ဆ် ကူးစက်ခံရရေ လူပေါင်း ၅၉,၈၀၄ ယောက်ကို မြင့်တက်လားပါရေ။ ၅,၉၁၁ ယောက်တော့ ပြန်ကောင်းလားလို့ ဆေးရုံက ဆင်းလားကတ်ဗျာလ်လို့လည်း တရုတ်နိုင်ငံ အမျိုးသား ကျန်းမာရေး ကော်မရှင်(National Health Commission)က ပြောလားပါရေ။
အေနိခါ ဂျပန်နိုင်ငံမှာ ကိုရိုနာဗိုင်းရာ့ဆ်နန့် ပထမဆုံး အသက် ၈၀ အရွယ် လူနာတယောက် သီလားပါရေ။ ယင်းဝါကြီးမက ဇိမ်ခံသင်္ဘောထက်မှာ ပါလာရေ ခရီးသယ် မဟုတ်ပါ။
ဂျပန်နိုင်ငံ ယိုကိုဟားမားကမ်းခြေမှာ ရပ်ထားရေ၊ စိန်မင်းသမီး(Diamond Princess) ဇိမ်ခံသင်္ဘောထက်မှာ၊ နောက်ထပ် ၄၄ ယောက် ကိုရိုနာဗိုင်းရာ့ဆ် အကူးခံရရေအတွက်၊ အဂုဆိုကေ ယင်းသင်္ဘောတစီးတည်းမှာ အကူးခံနိန်ရရေ လူပေါင်း ၂၁၉ ယောက်ထိ မြင့်တက်လာပါရေ။ ယင်းချင့်တောင် သင်္ဘောထက်မှာ ရှိနိန်ရေ လူ ၃,၇၀၀ အထဲက၊ လူ ၅၀၀ ကို စစ်ကြည့်စွာမှာ ၂၁၉ ယောက်မှာ တွိရစွာလို့ ပြောပါရေ။
အေနိ ဆိန်ဂါပေါ်နိုင်ငံ(Singapore)မှာလည်း အယင်လူတိဘားက ဆက်ကူးခံရလို့ နောက်ထပ် ၈ ယောက် တိုးလာပါရေ။ အဂုဆိုကေ ဆိန်ဂါပေါ်နိုင်ငံမှာ ကိုရိုနာဗိုင်းရာ့ဆ် အကူးခံရရေ လူပေါင်း ၅၈ ယောက်ထိ တက်လာပါရေ။
အဂုဆိုကေ ကဗာတဝှမ်းက နိုင်ငံပေါင်း ၂၅ နိုင်ငံမှာ လူပေါင်း ၅၇၀ ကျော်ထိ ကိုရိုနာဗိုင်းရာ့ဆ် အကူးခံလာရပါရေ။
အမေရီကန်ကျန်းမာရေးကျွမ်းကျင်ပညာရှင်တယောက်က၊ အေကိုရိုနာဗိုင်းရာ့ဆ်စွာ၊ အေရာသီကုန်တောင်မက၊ အေနှစ်ကုန်ကေတောင် ပျောက်နိုင်ဖို့ မဟုတ်သိမ့်လို့လည်း၊ တွက်ချက်ပနာ ပြောလားပါရေ။
ကိုရိုနာဗိုင်းရာ့ဆ် အေထက်ရာ ပျံ့လာဖို့ဆိုကေ၊ ဥရောပနိုင်ငံတိအကြား၊ အတားအဆီး မရှိ လားနိုင်ရေ နယ်စပ်တိကို၊ လိုအပ်ကေ ပိတ်ပင်လားဖို့လို့ အေနိ ဥရောပသမဂ္ဂ ကျန်းမာရေးဝန်ကြီးတိ အစည်းအဝေးအဗြီးမှာ သတင်းထုတ်ပြန်လားပါရေ။
ကိုရိုနာဗိုင်းရာ့ဆ် ကူးစက်တေ ပြဿနာတိ ပေါ်လာရေ ၂ လအတွင်း၊ ဂျပန်နိုင်ငံက ကားထုတ်လုပ်တေ ကင်ပဏီကြီး နိဆန်(Nissan)စွာ၊ အယင်နှစ်က အချိန်နန့် နှိုင်းစာကြည့်ကေ၊ အယင်နှစ် အမြတ်အစွန်းထဲက ၈၃% ထိ ဆုံးရှုံးလားပါဗျာလ်။ ရှိဆက်လို့ ကကောင်းဆိုးရွားရေ အခက်အခဲတိ ရှိလာဖို့သိမ့်လို့ ခန့်မှန်းထားပါရေ။
တနိုင်ငံကလည်း လက်မခံလို့ ကမ်းကပ်လို့ မရ ဖြစ်နိန်ရေ ဇိမ်ခံသင်္ဘော ဝပ်ဆတာဒန်(Westerdam)ကိုတော့ခါ ကန်ဘောဒီယားနိုင်ငံက လက်ခံလိုက်တေအတွက်၊ နက်ဖြန်မိုးသောက်ခါ ကန်ဘောဒီးယားနိုင်ငံ၊ ဆီဟာနူဗီလီ သင်္ဘောဆိပ်(Sihanoukville port)မှာ ခရီးသယ်တိ ကမ်းဆင်းခွင့်ရလားပါဖို့။