ကိုရိုနာဗိုင်းရာ့ဆ် ကူးစက်မှု ၃ သန်းကျော်မှာ အမေရီကန် ၁ သန်းကျော်

အေနိ တကဗာလုံးမှာ ကိုရိုနာဗိုင်းရာ့ဆ် ကူးစက်ခံရရေ လူနာပေါင်း ၃ သန်း အထက်ကို တက်လာပါရေ။ ယင်းအထဲမှာမှ အမေရီကန်ပြည်ထောင်စု တခုတည်းမှာ၊ ကူးစက်ခံရရေ လူပေါင်း ၁ သန်း ကျော် ရှိနိန်ပနာ၊ ကဗာ့ ကူးစက်ခံရမှု ၃ ပုံ ၁ ပုံ နန့် ကူးစက်မှု အများဆုံးနိုင်ငံ ဖြစ်နိန်ပါရေ။

တကဗာလုံးမှာ သီရေ လူပေါင်းလည်း ၂ သိန်း ၁ သောင်း ကျော် ရှိလာပနာ၊ အမေရီကန်ပြည်ထောင်စု တခုတည်းမှာ သီရေ လူပေါင်း ၅ သောင်း ၇ ထောင် ကျော် ရှိနိန်ပနာ၊ တကဗာလုံးမှာ သီဆုံးမှု ၄ ပုံ ၃ ပုံ ကျော် ရှိနိန်ပါရေ။

ဝမ်းနည်းဖို့ ကောင်းစွာက တကဗာလုံးမှာ ကူးစက်မှုနှုန်းနန့် သီရေနှုန်း၊ နှုန်းထားလမ်းကြောင်းက အရှိန်ယော့ကျလားစွာကို မတွိရသိမ့်ပါ။

ကူးစက်မှု အများဆုံး ဗဟိုချက်မ ဖြစ်ခရေ၊ အနောက်ဥရောပနိုင်ငံတိမှာတော့ ကူးစက်မှုနှုန်းနန့်၊ သီဆုံးမှုနှုန်း ယော့ကျလာစွာကို တွိလာရကေလည်း၊ နောက်ပိုင်းမှ ကူးစက်ခံရရေ ဥရောပတိုက်ထဲက ရာရှားနိုင်ငံမှာတော့ ကူးစက်မှုနန်းနန့် သီရေနှုန်း မြှင့်တက်နိန်တုန်းပါ။

အာရှတိုက်နိုင်ငံတိ အထဲမှာတော့ တာကီနိုင်ငံ(Turkey)က ကူးစက်ခံရရေ လူပေါင်း ၁ သိန်း ၁ သောင်း ၄ ထောင် နန့် ကူးစက်ခံရရေ အထဲမှာ ထိပ်ဆုံးက ရှိနိန်ပနာ၊ သီဆုံးမှု အများဆုံးနိုင်ငံက လူပေါင်း ၅ ထောင် ၈ ရာကျော်နန့် အီရန်နိုင်ငံ ဖြစ်နိန်ပါရေ။