ဓနဥစ္စာ အချက်အလက် ကုမ္ပဏီ ဝပ်သ် – အိပ်ခ် (Wealth-X) အစီရင်ခံစာအရ ၂၀၁၇ ခုနှစ်မှာ ဘီလီယံနာ (ဒေါ်လာ သန်း ၁ ထောင် ချမ်းသာရေ လူ) အရေအတွက် ၂၇၅၄ ယောက်ထိ ရောက်လာရေအတွက် ကဗာ့အများဆုံး စံချိန်တခု ဖြစ်လာပါရေ။ ယင်းလူတိ စုစုပေါင်း ပိုင်ဆိုင်မှုက ဒေါ်လာ ၉.၂ ထရီလီယံ (ဘီလီယံ ၉၂၀၀) ရှိလာရေအတွက် ၂၀၁၆ ခုနှစ်မှာ ပိုင်ဆိုင်ခကတ်စွာထက် ၂၄% ပိုချမ်းသာလာကတ်ပါရေ။
အမေရီကန်ပြည်ထောင်စုမှာ အယင်နှစ်က ဘီလီယံနာ အယောက် ၆၀ ထပ်တိုးလာပနာ စုစုပေါင်း အရေအတွက် ၆၈၀ ယောက် ရှိလာရေအတွက်၊ တကဗာလုံးမှာ ရှိရေ ဘီလီယံနာ အရေအတွက် ၂၅% ရှိလာပါရေ။ တရုတ်ပြည်မှာတော့ ၃၃၈ ယောက်ထိ ရှိလာပါရေ။
တကဗာလုံးက ဘီလီယံနာတိ အရေအတွက်ကို အောက်က ပုံမှာ ကြည့်နိုင်ပါရေ။
တကဗာလုံးမှာ ရှိရေ လူချမ်းသာ ၁% ပိုင်ဆိုင်မှုက တကဗာလုံး ပိုင်ဆိုင်မှု ၅၀% ရှိပါရေ။ ယောကျာ်း ဘီလီယံနာတိ အရေအတွက်က မမက် ဘီလီယံနာတိ အရေအတွက်ထက် ပိုများနိန်သိမ့်ကေလည်း၊ မမက် ဘီလီယံနာတိ တိုးလာရေ နှုန်းက ယောကျာ်းတိထက် အရှိန်အဟုန် ပိုများနိန်ပါရေ။
၂၀၁၇ ခုနှစ်မှာ ကဗာ့အချမ်းသာဆုံး ပုဂ္ဂိုလ်က အမေဇုန် (Amazon) အွင်လိုင်း စီးပွားရေးကို တည်ထောင်ရေ ဂျပ်ဖ် ဘီးဇို့စ် (Jeff Bezos) ဖြစ်လာပနာ၊ ပိုင်ဆိုင်မှု အမေရီကန်ဒေါ်လာ ၁၁၂ ဘီလီယံ ရှိနိန်ပါရေ။ ဘဲလ် ဂိတ်စ် (Bill Gates)၊ ဝါရမ်း ဘာ့ဖ်ဖတ် (Warren Buffett) နန့် ဖတ်ရှန် ဒီဇိုင်နာ ဘားနာ့ဒ် အားနော့တ် (Bernard Arnault) ရို့က ဒုတိယ၊ တတိယ၊ စတုတ္ထ အချမ်းသာဆုံး ပုဂ္ဂိုလ်တိအဖြစ် အသီးသီး ရှိနိန်ကတ်ပါရေ။
