တောင်တရုတ်ပင်လယ်ထဲမှာ အမေရီကန်စစ်သင်္ဘောတိ ခြီရှုပ်လာရေပိုင်၊ အမေရီကန်ပြည်ထောင်စုနန့် ဆက်ဆံရေးလည်း၊ ကကောင်း တင်းမာလာရေအတွက်၊ “တိုက်ပွဲအတွက် ပြင်ဆင်ဖို့ လိုလာဗျာလ်” လို့ တရုတ်သမ္မတ ရှီ ကျင်းပိန် က၊ တရုတ်စစ်တပ် အရာရှိတိကို ပြောလိုက်ပါရေ။ အမေရီကန်ပြည်ထောင်စုနန့် အဆိုးရွားဆုံး အနိန်အထားအတွက် ပြင်ဆင်ထားဖို့ လိုရေလို့ ဆိုပါရေ။
ဗြီးခရေ အပတ်က၊ မဟာဗျူဟာ စစ်မြေပြင် ၅ ခုထဲက တခုဖြစ်တေ၊ တောင်ပိုင်း စစ်ဌာနချုပ်(Southern Theatre Command) စစ်အရာရှိတိနန့် တွိဆုံစွာမှာ၊ ရှီ က ပြောလိုက်စွာပါ။ ဂင်ဒေါင်းဒေသ(Guangdong province)ကို ၄ ရက်ခရီး တာဝန်နန့် လားစွာမှာ၊ ရှီ က ဗြီးခရေ ကြာသပဒီးနိမှာ ပြောခစွာလို့၊ တရုတ်အစိုးရ သတင်းဌာနက သောက်ကြာနိ သတင်းမှာ ဖော်ပြထားပါရေ။
“လှုပ်ရှားမှုတိကို မြှင့်တင်လားဖို့ လိုရေ။ … တိုက်ပွဲတပွဲ တိုက်ဖို့တွက် အားစိုက်ပနာ ပြင်ဆင်ထားကတ်။” လို့ သမ္မတ ရှီ က မှာကြားပါရေ။ “ရှုပ်ထွေးနိုင်ရေ အခြေအနေတိ အားလုံးကို သုံးသပ်ပနာ၊ အရေးပေါ် အစီအစဉ်တိကို ဇာအနိန်အထားက ဖြစ်လာလာ၊ အဆင်သင့်ဖြစ်အောင် လုပ်ထားဖို့ လိုရေ။”
“စစ်မြေပြင်အတွက် အဆင်သင့် ဖြစ်အောင် လေ့ကျင့်ထားရဖို့၊ ပူးတွဲ စစ်ရေး လေ့ကျင့်မှုတိ၊ စစ်မြေပြင် လေ့ကျင့်မှုတိနန့် စစ်မှုထမ်းတိ အရည်အသွေးကို မြှင့်တင်လားဖို့ လိုရေပိုင်၊ တိုက်ပွဲအတွက် အသင့်အနိန်အထားမှာ ရှိနိန်ရဖို့။” လို့လည်း ပြောလားပါရေ။
