ဆင်းရဲရေ လူတိကို အဓိကထားရွီကေ အရွယ်ရောက်ဗြီးသား ကဗာ့ လူဦးရေ တဝက် ပိုင်ဆိုင်စွာရေ ကဗာ့ အချမ်းသာဆုံး ၁ ရာခိုင်နှုန်း လူဦးရေ ပိုင်ဆိုင်စွာလောက် မရှိလို့ ခြတ်ဒဲ့တ် ဆူစ်ဆီ(Credit Suisse) အစီရင်ခံစာ တစောင်မှာ တွိရပါရေ။ ၂၀၀၈ ခုနှစ် ငွေကြေးဂယက် နောက်ပိုင်းမှာ ကကောင်း ချမ်းသာရေ လူတိနန့် ဆင်းရဲသားတိ ကွာဟမှု အရှိဆုံး အချိန်လို့ ပြောလို့ရပါရေ။
၂၀၀၈ ခုနှစ်မှာ ကဗာ့အချမ်းသာဆုံး လူဦးရေ ၁ ရာခိုင်နှုန်း ပိုင်ဆိုင်မှုက တကဗာလုံး ချမ်းသာမှု ၄၂.၅ ရာခိုင်နှုန်း ရှိခပါရေ။
အောက်ခြီဆင်းရဲသား အရွယ်ရောက်ဗြီးသား ကဗာ့ လူဦးရေ တဝက် ပိုင်ဆိုင်စွာရေ တကဗာလုံး ပိုင်ဆိုင်မှု ၁ ရာခိုင်နှုန်းတောင် မရှိလို့ဆိုပါရေ။ ယကေလည်း ကဗာ့အချမ်းသာဆုံး ၁၀ ရာခိုင်နှုန်း လူဦးရေ ပိုင်ဆိုင်မှုက တကဗာလုံး ပိုင်ဆိုင်မှု ၈၈ ရာခိုင်နှုန်း ရှိရေလို့ဆိုပါရေ။
အယင်နှစ်က အမေရီကန် ဒေါ်လာ ၁ သန်း ချမ်းသာလာရေ လူ ၂.၃ သန်း ပိုလာပနာ အဂု တကဗာလုံးမှာ ဒေါ်လာ သန်းကြွယ်သဌေး ၃၆ သန်း ရှိရေလို့ ပြောပါရေ။
အဆင်းရဲဆုံး လူဦးရေ သန်း ၃၅၀၀ စွာ ကဗာ့ အလုပ်သမားဦးရေ ၇၀ ရာခိုင်နှုန်း ရှိပနာ တယောက်ဇီ ပိုင်ဆိုင်မှုက ဒေါ်လာ ၁ သောင်းအောက်မှာရာ ရှိရေလို့ဆိုပါရေ။ ယင်းလူတိ အားလုံး စုစုပေါင်း ချမ်းသာမှုက ကဗာ့ချမ်းသာမှု ၂.၇ ရာခိုင်နှုန်းရာ ရှိပါရေ။
အဂု ကဗာ့ချမ်းသာမှုက ၂၈၀ ထရီလီယံ ရှိပနာ နောက် ၅ နှစ်မှာ ၃၄၀ ထရီလီယံ ရှိလာဖို့လို့ဆိုပါရေ။ ပျမ်းမျှ အရွယ်ရောက်တေ လူတယောက်စွာ ဒေါ်လာ ၅၆၅၄၀ ပိုင်ရေလို့ သိရပါရေ။
မိတ်ဆွေမှာ ဒေါ်လာ ၇၆၇၅၄ ပိုင်ဆိုင်ကေ ကဗာ့အချမ်းသာဆုံး ၁၀ ရာခိုင်နှုန်း လူဦးရေထဲမှာ ပါပါရေ။ မိတ်ဆွေပိုင်ဆိုင်မှုက ဒေါ်လာ ၇၇၀၃၈၈ ရှိရေဆိုကေတော့ခါ ကဗာ့အချမ်းသာဆုံး ၁ ရာခိုင်နှုန်းထဲမှာ ပါနိန်ရေဆိုစွာကို သတိပြုလိုက်ပါ။
ကိုးကား – https://www.rt.com/business/409815-rich-people-wealth-poor/
(ကိုင်း လူ့လောကမှာ ပကတိ ဖြစ်ပျက်နိန်ရေ အထက်က ကိန်းဂဏန်းတိကို ကြည့်ပနာ ရခိုင်ညီအကိုမောင်နှမရို့ကို သတိပြုဇီချင်စွာက လောကမှာ ကာယတခုတည်းနန့် ကြိုးစားနိန်တိုင်း ငွေရေးကြေးရေးမှာ မတိုးတက်လာနိုင်ဆိုစွာပါ။ ဉာဏကို အဓိက မဏ္ဏိုင်ပြုပနာ ကြိုးစားဖို့ လိုပါရေ။ Arakan Online က ညီအကိုမောင်နှမရို့အတွက် အကောင်းဆုံး အသိပညာတိကို တတ်အားရှိသရွီ ဝီမျှပီးလားပါမေ။ လူများတိနောက်မှာ ရခိုင်သားတိကို မကျန်ခဇီချင်လို့ပါ။ ကိုယ်သိပြီးသားတိကိုလည်း ကျန်နိန်သိမ့်ရေ ညီအကိုမောင်နှမတိကို ဆက်ဝီပီးပါလို့ မေတ္တာရပ်ခံပါရေ။)
