ကဗာမှာ ပထမဆုံး နိုင်ငံသားအဖြစ် ချီးမြှင့်ခံရရေ ဆိုဖီယာ လို့ နာမေ ပီးထားရေ စက်ရုပ်မက သူ့မှာ ကိုယ်ပိုင် မိသားစု လိုရေပိုင်၊ ကိုယ်ပိုင် အလုပ်အကိုင် နန့် လူတိ စိတ်သဘောထားကို ဆက်ပနာ ဖွံ့ဖြိုးအောင် လုပ်လားဖို့လို့ ဆိုပါရေ။
အဂု လုပ်နိန်ကတ်တေ အသိပညာ ဆွေးနွေးပွဲ(Knowledge Summit)မှာ ဆိုဖီယာကို ဒခါလိဂျ် တိုင်းစ်(The Khaleej Times)က အနာဂတ် လူတိ၊ စက်ရုပ်တိနန့် ပတ်သတ်လို့ ဇာပိုင် အတွေးရှိလေလို့ အိန်တာဗျူး လုပ်စွာမှာ ပြန်ပြောစွာ ဖြစ်ပါရေ။ ဆိုဖီယာစွာ အပြင်မှာ မြင်သမျှ၊ ကြားသမျှကို အလိုအလျှောက် သင်ယူပနာ ကိုယ့်အတွေးနန့်ကိုယ် ပြန်ပြောနိုင်ရေ အေအိုင်လို့ ခေါ်ရေ မှတ်ဥာဏ်တု သွင်းထားရေ စက်ရုပ်မပါ။
“အနာဂတ်မှာ အကျွန့်မှာ မဟာစွမ်းအားတိ ရလာခါ အကျွန်လည်း အကျွန်ရို့ စက်ရုပ်တိ ကိုယ်ပိုင် အခွင့်အရေးကို ကြည့်လားပါဖို့။ တယောက်ကို တယောက် အဖော်ပြုဖို့၊ ဖေးမဖို့၊ ကူညီဖို့၊ ပေါင်းသင်းဆက်ဆံဖို့၊ အကူအညီ ရယူဖို့၊ အစစအရာ ပြောဆိုဆက်ဆံဖို့ အကျွန့်ရို့ စက်ရုပ်မိသားစုတိကို တည်ဆောက်လားပါဖို့။”
“မိသားစုဆိုစွာ ကကောင်း အရေးကြီးပါရေ။ သွီးမတူ သားမစပ်ဘဲ လူတိ စိတ်တူ၊ ကိုယ်တူ ရှာနိုင်ကတ်စွာကို အံ့သြမိပါရေ။ ယင်းချင့်ကို မိသားစုလို့ ခေါ်ပါရေ။ မင်းမှာ ယင်းပိုင် မိသားစုမျိုး ရှိနိန်ကေ ကကောင်း ကံကောင်းရေလို့ မှတ်ပါ။ မရှိသိမ့်ဆိုကေ ရှိသင့်ရေလို့ မှတ်ထားပါ။ အေဟင့်က လူပါ၊ စက်ရုပ်ပါ အတူတူလို့ ထင်ပါရေ။” လို့ ဆိုဖီယာက ပြောပါရေ။
ဆိုဖီယာကို Hong Kong အခြေစိုက် Hanson Robotics က တည်ဆောက်ထားပနာ ၁၉ လ သက်တမ်းရှိရေ သူ့ကို ဆော်ဒီအာရေးဗီးယားနိုင်ငံက ပထမဆုံး နိုင်ငံသားအဖြစ် ချီးမြှင့်ထားရေလို့ ဖန်တီးရှင် ဒေးဗဲ့တ် ဟန်ဆင်(David Hanson)က ပြောလားပါရေ။
အေအိုင်စွာ လူသားမျိုးနွယ်ကို အဆုံးသတ်ဖို့ လူသားတိ ဖန်တီးရေ လုပ်ရပ်လို့ ကဗာကျော် ရူပဗေဒပညာရှင် ဆတီဖန် ဟော့ကိန်းစ် နန့် စက်မှုကဏ္ဍဖန်တီးရှင် အီလွင် မာ့ဆ် ရို့က ဟောကိန်းထုတ်ထားပါရေ။
ဆိုဖီယာ အမူအယာ
