၂၀၁၇ ခုနှစ် နိုဗန်ဘာ ၂၆ ရက် – အေနိန့် ဘဲ့တ်ကွိုင်း ၁ ခတ် တန်ဖိုးစွာ ဒေါ်လာ ၈၇၀၀ အထက်ကို ထောင်တက်လားပြန်ပါရေ။ အေလ အစောပိုင်းက ဘဲ့တ်ကွိုင်း ဖွံ့ဖြိုးရေး ပညာရှင်တိက ဆော့ဖ်ဝဲလ် SegWit2X မြှင့်တင်စွာကို ရပ်လိုက်တေခါ ဘဲ့တ်ကွိုင်း တည်ဆောက်တေ လူတိနန့် ရင်းနှီးမြှပ်နှံရေ လူတိက ရှိရေ ဘဲ့တ်ကွိုင်းတိကို ထုတ်ရောင်းကတ်တေအတွက် ဘဲ့တ်ကွိုင်း ၁ ခတ် တန်ဖိုးစွာ ၅၅၀၀ ထိ ထိုးဆင်းလားခဖူးပါရေ။
အဂုအခါ ဘဲ့တ်ကွိုင်းကို တနိန့်တခြား ရင်းနှီးမြှပ်နှံလာကတ်တေပိုင်၊ ငွေကြေးအဖွဲ့အစည်းတိကလည်း တစတစ ပိုပနာ လက်ခံလာကတ်ပါဗျာလ်။
ဘဲ့တ်ကွိုင်းကို ဇာ အစိုးရ၊ ဇာ ဘဏ်၊ ဇာ အဖွဲ့အစည်းကလည်း ထိန်းချုပ်လို့ မရနိုင်ရေအတွက် အစိုးရတိနန့် ဘဏ်လုပ်ငန်းတိက လက်ခံဖို့ ခက်ခဲနိန်ကတ်ပါရေ။ ယကေလည်း ဘဲ့ကွိုင်းစွာ သာမန်လူတိကြားမှာ တရက်ထက် တရက် ရီပန်းစားလာပနာ အွင်လှိုင်း ဖေသာပီးရေ စနစ်တိမှာ တတွင်ကျကျယ် သုံးလာနိန်ကတ်ပါဗျာလ်။
ဘဲ့တ်ကွိုင်း စပေါ်ရေ လွန်ခရေ ၉ နှစ်က ဘဲ့တ်ကွိုင်း ၁ ခတ် တန်ဖိုးစွာ ဖေ့သာ ၁ ဆင့်တောင် တန်ဖိုး မရှိခကေလည်း အေနိန့်ခါ ဘဲ့တ်ကွိုင်း ၁ ခတ် တန်ဖိုးစွာ ဒေါ်လာ ၈၇၀၀ ကို ကျော်လာရေအတွက်၊ လွန်ခရေ ၉ နှစ်ကရာ ဘဲ့တ်ကွိုင်း ၁ ဒေါ်လာ(၁၀၀၀ ကျပ်)ဖိုးလောက် ဝယ်ထားခဖို့ဆိုကေ အေနိန့်ခါ ဒေါ်လာ သန်းကြွယ်သဌေး ဖြစ်နိန်လောက်ပါဗျာလ်။
(အလုပ် လုပ်နိန်စွာ တခုတည်းနန့် ဘဝကို အောင်မြင်ဖို့ မလွယ်ပါဗျာလ်။ ခေတ်ရီစီးကြောင်းကို မပြတ် စောင့်ကြည့်ဖို့ လိုပါရေ။)
