ကဗာ့ရွှေစျီးနှုန်းကို တရုတ်နန့် ရာရှားက ရွှေအစစ်နန့် စျီးသတ်မှတ်လာနိုင်

ဘီအာရ်အိုင်စီအပ်စ်(BRICS)လို့ခေါ်ရေ ဘရာဇီး၊ ရာရှား၊ အိန္ဒိယ၊ တရုတ်နန့် တောင်အမေရိကနိုင်ငံရို့က ကဗာ့ရွှေကို အများဆုံးထုတ်တေ နိုင်ငံတိ ဖြစ်တေပိုင်၊ အများဆုံး သုံးနိန်ကတ်တေ နိုင်ငံတိလည်း ဖြစ်နိန်ပါရေ။ ယင်းအတွက်နန့် အေနိုင်ငံတိက အမှန်တကယ် ရောင်းဝယ်နိန်ကတ်တေ ရွှေအစစ်တိနန့် ကဗာ့ရွှေစျီးကို သတ်မှတ်လာနိုင်ရေ အနိန်အထားမှာ ရှိနိန်ပါရေ။ ယင်းပိုင်ရာ ဖြစ်လာဖို့ဆိုကေ ကဗာ့ရွှေစျီးနှုန်းတိစွာ တမျိုးတဖုံ ပြောင်းလဲလားနိုင်ပါရေ။

အဂု ကဗာ့ရွှေစျီးနှုန်းကို လန်ဒန်မြို့နန့် နယူးယော့ခ်မြို့ရို့က ထိန်းချုပ်ထားပါရေ။ လန်ဒန်မြို့က အိုတီစီ(Over-the-Counter (OTC)) နန့် နယူးယော့ခ်က ကိုမတ်ဇ်(COMEX)ကရာ ကဗာ့ရွှေစျီးနှုန်းကို ကိုင်တွယ်ကတ်ပါရေ။

အိုတီစီ နန့် ကိုမတ်ဇ် နှစ်ခုလုံးစွာ ရွှေအစစ်တိ အရောင်းအဝယ် လုပ်နိန်ကတ်စွာကို အခြေခံပနာ စျီးနှုန်းသတ်မှတ်ကတ်စွာ မဟုတ်ပါ။ လန်ဒန် အိုတီစီ,က ရွှေတိ ရွိလားနိန်စွာကို အခြေခံဗျာလ် ရွှေစျီးကို ခန့်မှန်းတွက်ချက်ပနာ၊ နယူးယော့ခ် ကိုမတ်ဇ်,က ရွှေ ကင်ထရတ်တိ အရောင်းအဝယ် လုပ်ကတ်စွာကို အခြေခံထားပါရေ။ နှစ်ခုလုံးစွာ အမှန်တကယ် ရွှေသားတိ အရောင်းအဝယ် လုပ်ကတ်စွာထက်၊ ရောင်းဝယ်ရေ ဖေ့သာကိုရာ အခြေခံထားကတ်ပါရေ။

ဘီအာရ်အိုင်စီအပ်စ်,ကရာ အဂင့်ဂင့် ရောင်းဝယ်နိန်ကတ်တေ ရွှေသားတိနန့် ရွှေစျီးနှုန်းကို သတ်မှတ်လိုက်ဖို့ဆိုကေ ကဗာ့ရွှေစျီးနှုန်းစွာ ဂျွမ်းထိုးမှောက်ခုံ ဖြစ်လာနိုင်ပနာ၊ ကဗာမှာ အနောက်နိုင်ငံတိ လွှမ်းမိုးမှုစွာလည်း လုံးဝ ဆုတ်ယုတ်လားနိုင်ပါရေ။

(ရာရှားသမ္မတ ပူတင်,က ရာရှားနိုင်ငံပိုင်ဘဏ်တိကို အသည်းအသန် ရွှေ စုဆောင်းခိုင်းနိန်စွာလည်း အဓိက အကြောင်းရင်းတခု ဖြစ်နိုင်ပါရေ။ ရခိုင်သားတိ နိန့်ချင်းရက်ချင်း ပြောင်းလဲနိန်ရေ ကဗာ့စီးကြောင်းထဲမှာ တရက်လည်း နောက်မကျ ကျန်လိုက်ရအောင်၊ ကဗာ့ နောက်ဆုံးရ သတင်းတိနန့် အခြေအနေတိကို Arakan Online က နိန့်တွင်းချင်း တင်ပြချက်တိနန့် သုံးသပ်ကတ်ပါ။)

ကိုးကား – https://www.rt.com/business/411763-russia-china-set-gold-price/