၂၀၁၇ ခုနှစ်မှာ၊ ရန်ဆင်းဝေးယား (Ransomware) လို့ ခေါ်ရေ ငွေညစ်တေ ဆော့ဖ်ဝဲလ်တိ အတိုက်ခံရစွာနန့်၊ စီးပွားရေး ပြတ်တောက်လားစွာတိအတွက်၊ ငွေကြေးအားဖြင့် အထိခိုက် အနစ်နာဆုံးနှစ် ဖြစ်တေလို့ အာမခံကုမ္ပဏီ အေအိုင်ဂျီ (AIG) က ဆိုပါရေ။
၂၀၁၇ ခုနှစ် မေလထဲမှာ ငိုချင်ရေ လို့ အဓိပ္ပာယ်ရရေ WannaCry Ransomware တိုက်ခိုက်ခံရစွာက အဆိုးရွားဆုံးလို့ ဆိုပါရေ။ ယင်းဆော့ဖ်ဝဲလ်ကို အမေရီကန် အမျိုးသား လုံခြုံရေး အေဂျင် (National Security Agency (NSA)) က၊ လူတိကို တတိတ်ချေ စောင့်ကြည့်ဖို့ သုံးရေ ဆော့ဖ်ဝဲလ်ကို ခိုးယူပနာ ပြန်မွမ်းမံလို့ လုပ်ထားစွာပါ။ ငိုချင်ရေ ရန်ဆင်းဝေးယားနန့် အတိုက်ခံရေ ကင်ပျူတာထဲက သတင်းအချက်အလက်တိကို ခိုးယူပနာ၊ ယင်းအချက်အလက်တိ အပြင်ကို မပေါက်ကြားဇီချင်ကေ ဖေသာပီးရဖို့ဆိုပနာ၊ အတိုက်ခံရရေ ကုမ္ပဏီကို ငွေညစ်တေ လုပ်ရပ်မျိုးပါ။
ငိုချင်ရေ ရန်ဆင်းဝေးယားနန့် အမှန်တကယ် ငွေညစ်လို့ ပီးလိုက်ရရေ ပမာဏက အမေရီကန်ဒေါ်လာ ၁ သိန်းခွဲရာ ရှိရေလို့ ဆိုပါရေ။ ယကေလည်း ထိခိုက်နစ်နာမှုက အမေရီကန်ဒေါ်လာ ၈ ဘီလီယံ ရှိရေလို့ အေအိုင်ဂျီ ဒုဥက္ကဌ ဂျိုးဆ် မာတိန်းဇ် (Jose Martinez) က ပြောပါရေ။ “အယင်နှစ်က ကုမ္ပဏီအများကြီး ဒူးထောက်ကျလားပါရေ။ အဓိက အကြောင်းရင်းက ကင်ပျူတာထဲမှာ သိုလှောင်ထားရေ သတင်းအချက်အလက်တိကို၊ အပို နောက်တခု ထပ်သိမ်းထားစွာမျိုး မရှိခလို့ပါ။”