စပိန်နိုင်ငံ မတ်ဒြတ်အစိုးရက လွတ်လပ်ရေး မဟုတ်ဘဲ၊ ပိုကောင်းရေ ကိုယ်ပိုင်အုပ်ချုပ်ရေး ယူဖို့၊ ပြည်သူ့ဆန္ဒကောက်ခံခိုင်းစွာကို၊ အာခံပနာ၊ စပိန်နိုင်ငံဘားက ခွဲထွက်ရေးကိုရာ တကျော့ပြန် တောင်းဆိုလားဖို့လို့၊ ကာတာလိုနီးယား ခွဲထွက်ရေးဂေါင်းဆောင် ကိန်း တော်ရာ(Quim Torra)က ပြောလိုက်ပါရေ။
ဗြီးခရေ မေလက ကာတာလိုနီးယား သမ္မတသစ် ဖြစ်လာရေ၊ တော်ရာ က “ကျွန်တော်ရို့ လှုပ်ရှားမှု” (Our Moment)လို့ နာမေပီးထားရေ ခွဲထွက်ရေး ဗျူဟာ အစီအစဉ်တိကို ညဇာက ချပြလားပါရေ။
တော်ရာ ရှိမှာ ကာတာလိုနီးယား သမ္မတ ဖြစ်ခရေ ကားလ်စ် ပူဂျ်ဒီမင့်တ် (Carles Puigdemont)လည်း ကာတာလိုနီးယား လွတ်လပ်ရေးကို စပိန်ဘားက တောင်းဆိုခလို့၊ ဘရာဆဲလ်စ်(Brussels)ကို ထွက်ဗြီးနိန်ရပါရေ။
ဗြီးခရေ တနင်္လာနိက ရိုက်တာ သတင်းဌာနနန့် တွိဆုံစွာမှာ၊ တော်ရာက “သူ့ကို ကာတာလိုနီးယား လွတ်တော်က တောင်းဆိုနိန်သမျှ၊ လွတ်လပ်ရေးကို ဆုံးခန်းတိုင် တောင်းဆိုလားဖို့”လို့ ပြောလားပါရေ။
ဗြီးခရေ တနင်္လာနိက စပိန်ဝန်ကြီးချုပ် ပီဒြို ဆန်ချိဇ်(Pedro Sanchez)က၊ ပိုပနာ လွတ်လပ်တေ ကိုယ်ပိုင်အုပ်ချုပ်ရေးအတွက် လူထုဆန္ဒကောက်ခံကတ်ဖို့ ပြောလိုက်စွာကို၊ ကာတာလန် ပါလီမန် ပြောခွင့်ရ ပုဂ္ဂိုလ် ရော်ဂျာ တော်ရန့်တ်(Roger Torrent)က ငြင်းဆိုလိုက်ပနာ၊ “ကာတာလန် ပြည်သူ အများစုက ကိုယ်ပိုင် ဆုံးဖြတ်ပိုင်ခွင့်ကိုရာ ပို လိုချင်ကတ်တေ” လို့ ပြောဆိုလိုက်ပါရေ။
၂၀၁၇ ခုနှစ်မှာ စပိန်အစိုးရ တားမြစ်နိန်ရေ ကြားက၊ လူထုဆန္ဒခံယူပွဲကို မရမက ကျင်းပပနာ၊ ကာတာလိုနီးယား လွတ်လပ်ရေးကို ကြေငြာခပါရေ။ ယင်းအတွက်နန့် စပိန်ဝန်ကြီးချုပ်ဟောင်း မာရီယာနို ရာဂျွိုင်း(Mariano Rajoy) ဦးဆောင်ရေ စပိန်အစိုးရက ကာတာလိုနီးယားကို တိုက်ရိုက်အုပ်ချုပ်ခပါရေ။ ယကေလည်း တော်ရာ သမ္မတ ဖြစ်လာစွာနန့် အာဏာကို ပြန်ပနာ လွှဲအပ်ပီးခပါရေ။ အဂုထိ ကာတာလိုနီယား ဂေါင်းဆောင် အများအပြားကို ပုန်ကန်မှုနန့် ဖမ်းဆီးထားတုန်းပါ။
၁၉၇၈ ခုနှစ်က စပနာ၊ ကာတာလိုနီးယားဒေသစွာ စပိန်နိုင်ငံဘားက ကိုယ်ပိုင်အုပ်ချုပ်ရေး ရထားစွာပါ။ အဂု တော်ရာ ချပြရေ အစီအစဉ်စွာ ကာတာလိုနီးယား အမျိုးသားနိ ဒိုင်ယာဒါ(Diada) မကျခင် ၁ ပတ် အလိုမှာပါ။ အေအမျိုးသားနိတိုင်းမှာ လွတ်လပ်ရေး လိုချင်ရေ ကာတာလန်ပြည်သူ သိန်းပေါင်းများစွာရေ လမ်းတိကို ထွက်ပနာ ဆန္ဒပြကတ်လေ့ ရှိပါရေ။
