လွန်ခရေ ဒီဇန်ဘာလကနိန် ဝူဟန်း ကိုရိုနာဗိုင်းရာ့ဆ် ကူးစက်ခံရရေ လူအရေအတွက်စွာ၊ အဂုဆိုကေ ၆ ထောင်ကျော်ကို ရောက်လာပါဗျာလ်။
၂၀၀၂ – ၂၀၀၃ ခုနှစ်အတွင်း ၉ လကြာ ဆားဆ်(SARS) ဗိုင်းရာ့ဆ် ကူးစက်ခံရစွာမှာ လူပေါင်း ၈,၀၉၈ ယောက် ရှိခပါရေ။ ကိုရိုနာဗိုင်းရာ့ဆ် စပြန့်စွာက ၂ လရာ ရှိသိမ့်ကေလည်း၊ အေအတွင်းမှာ ကူးစက်ခံရရေ လူပေါင်းက ၆,၀၀၀ ကျော်လာရေအတွက်၊ ရာခိုင်နှုန်းနန့် ပြောဖို့ဆိုကေ၊ ဆားဆ်ဗိုင်းရာ့ဆ် အကူးခံခရရေ လူအရေအတွက် ၇၅% ကို ရောက်နိန်ပါရေ။
လက်ရှိမှာ ဝူဟန်း ကိုရိုနာဗိုင်းရာ့ဆ် ကူးစက်ခံရပနာ သီရေ လူ ရာခိုင်နှုန်းက ၂.၁% ဖြစ်ပနာ၊ ဆားဆ်ဗိုင်းရာ့ဆ် ကူးစက်ခံရရေခါ သီရေ လူ ရာခိုင်နှုန်းက ၉.၆% ရှိခပါရေ။ အယင် ကိုရိုနာဗိုင်းရာ့ဆ် တမျိုးဖြစ်တေ၊ မားဆ်(Middle East respiratory syndrome (MERS) ) ဗိုင်းရာ့ဆ် ကူးစက်ခံရခါ သီခရေ လူ ရာခိုင်နှုန်းကလည်း ၃၅% ထိ ရှိခပါရေ။ ပြောဖို့ဆိုကေ အယင် ဆားဆ်၊ မားဆ် ဗိုင်းရာ့ဆ်တိလောက်တော့ခါ မပြင်းသိမ့်လို့ ပြောရပါဖို့။
လောလောဆယ် ဝူဟန်း ကိုရိုနာဗိုင်းရာ့ဆ် ကူးစက်ခံနိန်ရရေ ကဗာတဝှမ်းက နိုင်ငံတိကို အောက်ပုံမှာ တွိနိုင်ပါရေ။
ပြင်ဆင်ချက် – အေသတင်းတင်ဗြီးလို့ နာရီဝက်အကြာမှာ၊ နောက်ဆုံးသတင်းတက်လာစွာက လူပေါင်း ၇ ထောင်ကျော်ထိ ကူးစက်လားဗျာလ်ဆိုစွာနန့်၊ တရုတ်နိုင်ငံမှာ လူပေါင်း ၁၇၀ ထိ သီလားဗျာလ်လို့ သိရပါရေ။ ဝူဟန်းမြို့ တခုတည်းမှာ ၁၆၂ ယောက် သီပနာ၊ လူပေါင်း ၄,၅၈၆ ယောက် ကူးစက်ခံနိန်ရဗျာလ်လို့ သိရပါရေ။ ၁ ရက်တည်းမှာ ၃၂ ယောက် ထပ်သီပနာ၊ ၁,၀၃၂ ယောက် ထပ်ကူးခံရစွာပါ။
