ကိုရိုနာဗိုင်းရာ့ဆ် ကူးစွာက ၂၀၀၃ ဆားဆ်ဗိုင်းရာ့ဆ်ကို ကျော်လာ

တရုတ်နိုင်ငံ ဝူဟန်းမြို့မှာ စပနာ၊ ကဗာအနှံ့ကို ပြန့်ပွားလာရေ ကိုရိုနာဗိုင်းရာ့ဆ် ကူးစက်မှုစွာ၊ ၂၀၀၃ ခုနှစ် ဆားဆ်ဗိုင်းရာ့ဆ် ကူးစက်ခမှုကို ကျော်လွန်လာပါဗျာလ်။

၂၀၀၃ ခုနှစ်မှာ ၈ လကြာ ပြန့်ပွားခရေ ဆားဆ်(Sars)လို့ ခေါ်ရေ အပြင်းစား အသက်ရှူလမ်းကြောင်းကျဉ်းရောဂါ(severe acute respiratory syndrome) ဖြစ်ခါ၊ လူပေါင်း ၈,၁၀၀ လောက်ရာ ကူးစက်ခပါရေ။

အဂု ဖြစ်နိန်ရေ ကိုရိုနာဗိုင်းရာ့ဆ်က ၂ လအတွင်းမှာ လူပေါင်း ၁ သောင်းနီးပါးလောက်ကို ကူးစက်နိန်ပါဗျာလ်။ တရုတ်နိုင်ငံ ပြင်ပ၊ နိုင်ငံပေါင်း ၂၂ နိုင်ငံမှာလည်း လူပေါင်း ၁၀၀ လောက်ကို ကူးစက်နိန်ပါရေ။

ကိုရိုနာဗိုင်းရာ့ဆ်နန့် လောလောဆယ် လူပေါင်း ၂၁၃ ယောက် တရုတ်နိုင်ငံ တခုတည်းမှာ သီဆုံးလားပါဗျာလ်။ ဆားဆ်ရောဂါ ဖြစ်ခါ အားလုံးပေါင်း ၇၇၄ ယောက် သီခဖူးပါရေ။

ဆားဆ်ရောဂါစွာလည်း ၂၀၀၂ ခုနှစ် နိုဗန်ဘာလမှာ တရုတ်နိုင်ငံ ဂင်ဒင်းဒေသ(Guangdong province)က စပနာ ပြန့်ပွားခစွာပါ။ နောက်နှစ် ဂျူလိုင်လကို ရောက်မှရာ အပြီးသတ် ထိန်းချုပ်နိုင်ခပါရေ။ နိုင်ငံပေါင်း ၂ ဒါဇင်ကျော်ထိ ပြန့်ပွားခဖူးပါရေ။

ကိုရိုနာဗိုင်းရာ့ဆ်က အယင်လကရာ စပနာ ပြန့်ပွားလာပနာ၊ ဆားဆ်လောက် နိုင်ငံအများကြီးကို မပြန့်ပွားသိမ့်ပါ။ ယကေလည်း တရုတ်နိုင်ငံတခုတည်းမှာ ကူးစက်ခံရရေ ပမာဏစွာ အယင်ဆားဆ် ကူးစက်ခံရရေ ပမာဏကို ကျော်လွန်လားပါဗျာလ်။

ဆားဆ်ရောဂါကြောင့် ကဗာ့စီးပွားရေးစွာ အမေရီကန်ဒေါ်လာ သန်း ၃ သောင်း($30bn (£22bn))လောက် ကုန်ကျခဖူးပါရေ။ အဂု ကိုရိုနာဗိုင်းရာ့ဆ်က အယင်ဆားဆ်ထက် ပိုပနာ ကုန်ကျနိုင်ရေလို့ စီးပွားရေးပညာရှင်တိက ခန့်မှန်းနိန်ကတ်ပါရေ။ အဂုတောင် တရုတ်နိုင်ငံထဲက စီးပွားရေးလုပ်ငန်းတိ အများကြီး ပိတ်ထားကတ်ရပါဗျာလ်။

အဂု ကိုရိုနာဗိုင်းရာ့ဆ်က တိဗတ်ထိတောင်ဆိုရေတော့ခါ၊ တရုတ် တနိုင်ငံလုံး ပြန့်နှံ့လားဗျာလ်လို့ ဆိုနိုင်ပါရေ။ တရုတ်နိုင်ငံနန့် နယ်ချင်းစပ်နိန်ရေ မြန်မာနိုင်ငံထဲလည်း ရောက်လာဖို့ အလားအလာ အများကြီး ရှိနိန်ပါရေ။

အတတ်နိုင်ဆုံး လူတိကို ရှောင်နိန်ဖို့၊ လူများရေ နိန်ရာတိကို မလားမဖြစ်လို့ လားရကေ မျက်နှာဖုံး စွပ်ထားဖို့၊ လက်ကို သပုန်နန့် အကြိမ်မျများ ဆီးပီးဖို့၊ ချောင်းဆိုး နှာချီပနာ ကိုယ့်စွာကို သံသယရှိကေ ချက်ချင်း ကျန်းမာရေးဌာနမှား လားစစ်ဆေးကြည့်ဖို့ ဆိုစွာတိကို အများပြည်သူ သိထားသင့်ပါရေ။