ကိုရိုနာဗိုင်းရာ့ဆ်စွာ ညဇာက တရက်တည်းမှာ နောက်ထပ် ၉၇ ယောက်ကို တရုတ်နိုင်ငံမှာ သီလားဇီရေအတွက်၊ အဂုအခါ ကိုရိုနာဗိုင်းရာ့ဆ်နန့် တကဗာလုံးမှာ သီရေလူပေါင်း ၉၁၀ ကို ရောက်လာပါရေ။ ဗိုင်းရာ့ဆ်မူရင်းဇတ်မြစ်၊ တရုတ်နိုင်ငံ ဟူဘီဒေသတခုတည်းမှာ၊ တနင်္ဂနီနိတရက်တည်း နောက်ထပ် လူပေါင်း ၂,၆၁၈ ယောက် ထပ်အကူးခံရပနာ၊ တကဗာလုံးမှာ ကိုရိုနာဗိုင်းရာ့ဆ် ကူးစက်ခံလာရရေ လူပေါင်းလည်း ၄၀,၅၀၀ ကျော်ကို ရောက်လာပါရေ။
ဂျပန်နိုင်ငံ တိုကျိုမြို့တော်နားက ယိုကိုဟားမားကမ်းခြေနားမှာ ရပ်ထားရေ၊ စိန်မင်းသမီးလို့ခေါ်ရေ ဇိမ်ခံသင်္ဘောထက်မှာလည်း၊ နောက်ထပ် ခရီးသယ် ၆၅ ယောက်မှာ ကိုရိုနာဗိုင်းရာ့ဆ် ထပ်တွိရေအတွက်၊ အဂုဆိုကေ ကူးစက်ခံလာရရေ လူပေါင်း ၇၀ ကနိန် တရက်တည်းမှာ ၁၃၅ ယောက်ကို မြင့်တက်လာပါရေ။
ဆိန်ဂါပေါ်နိုင်ငံကနိန် ပြန်လာရေ ဗြီတိန်နိုင်ငံသား ၁ ယောက်ကနိန်၊ ကိုရိုနာဗိုင်းရာ့ဆ် နောက်ထပ် ၄ ယောက်ကို ထပ်ကူးရေအတွက်၊ အဂုဆိုကေ ယူကေနိုင်ငံမှာလည်း ကိုရိုနာဗိုင်းရာ့ဆ် အကူးခံရရေ လူပေါင်း ၄ ယောက်ကနိန်၊ တရက်တည်းမှာ ၈ ယောက်ကို ခုန်တက်လာပါရေ။
ကိုရိုနာဗိုင်းရာ့ဆ်နန့် ထပ်ပါလာရေ ပြဿနာက၊ ကဗာ့အများဆုံး ပစ္စည်းထုတ်လုပ်တေ တရုတ်နိုင်ငံက စက်ရုံ၊ အလုပ်ရုံ အများအပြား ရပ်ထားရရေခါ၊ တကဗာလုံးမှာ စီးပွားရေးတိ ကမောက်ကမ ဖြစ်ပနာ တရိပ်ရိပ်ကျဆင်းလာစွာပါ။ ဆက်သွယ်ရေးတိ ပြတ်တောက်မှုတိနန့် အတူ၊ အဂုဆိုကေ တရုတ်နိုင်ငံမှာ အစားအသောက်၊ ကျန်းမာရေးပစ္စည်းတိနန့် အဝတ်အထည်တန်ဖိုးတိ တရိပ်ရိပ် ထိုးတက်လာနိန်ပါဗျာလ်။ သွင်းကုန်ထုတ်ကုန် များရေ နိုင်ငံတိမှာလည်း ကုန်ပစ္စည်းတိ၊ ရှားပါးမှု၊ ပေါလောမှု ၂ ခုလုံးကို တပြိုင်နက်တည်း ကြုံရနိုင်ပါရေ။
မှတ်ချက် – ရခိုင်ပြည်က လယ်သမားတိ မရောင်းရသိမ့်ရေ၊ ဆန်၊ စပါးတိကို အဂုအချိန်မှာ ထုတ်မရောင်းဘဲ သိမ်းထားသင့်ပါရေ။
