Covid-19 ကိုရိုနာဗိုင်းရာ့ဆ်ကို ကာကွယ်ဖို့အတွက်၊ ဥရောပတိုက် ၂၆ နိုင်ငံက နိုင်ငံသားတိ၊ အမေရီကန်ပြည်ထောင်စု ဝင်ခွင့်ကို၊ အေသောက်ကြာနိ ညဉ့်သန်းခေါင်ကနိန်၊ ရက် ၃၀ ကြာ ပိတ်ပင်လိုက်တေလို့၊ အမေရီကန်ပြည်ထောင်စုသမ္မတ ဒိုနဲလ် ထရုန့်ပ် က အေနိ ကြေငြာလိုက်ပါရေ။ ပိတ်ပင်ရေ ဥရောပနိုင်ငံတိထဲမှာ၊ ယူကေနိုင်ငံတော့ မပါပါ။ (ယူကေနိုင်ငံလို့ဆိုကေ၊ အင်္ဂလန်၊ ဝဲလ်၊ ဆကော့တ်တလန်၊ မြောက်ပိုင်းအိုင်ယာလန် ၄ ခုပေါင်းလို့ ဆိုလိုပါရေ။ အင်္ဂလန်နိုင်ငံလို့ မခေါ်ပါ။)
အေနိထိ အမေရီကန်ပြည်ထောင်စုက ပြည်နယ် ၄၃ ခုမှာ ကိုရိုနာဗိုင်းရာ့ဆ် ကူးစက်ခံရရေ လူပေါင်း ၁,၂၆၇ ယောက် ရှိလားပနာ၊ ၃၈ ယောက် သီလားပါဗျာလ်။
တကဗာလုံးမှာ ကူးစက်ခံရရေ လူပေါင်း ၁၁၈,၀၀၀ ကျော် ရှိလားပနာ၊ လူပေါင်း ၄,၃၀၀ လောက် သီလားပါဗျာလ်။
တရုတ်နိုင်ငံမှာ Covid-19 ကိုရိုနာဗိုင်းရာ့ဆ်ကို ထိန်းချုပ်နိုင်လားဗျာလ်လို့ တရုတ်နိုင်ငံ အမျိုးသား ကျန်းမာရေး ကော်မရှန် က ပြောလားပါရေ။
အဂု ကဗာမှာ အဆိုးရွားဆုံးနိုင်ငံက ဥရောပတိုက်က အီတလီနိုင်ငံပါ။ ညဇာက တရက်တည်းမှာ အီတလီနိုင်ငံမှာ လူပေါင်း ၁၉၆ ယောက်၊ ကိုရိုနာဗိုင်းရာ့ဆ်နန့် သီပနာ၊ စုစုပေါင်း သီရေ လူပေါင်း ၈၂၇ ယောက်ကို မြင့်တက်လားပါရေ။ ညဇာက တရက်တည်းမှာ လူပေါင်း ၂,၀၀၀ ထပ်ကူးခံရရေလို့ ကြေငြာပနာ၊ အဂုဆိုကေ လူပေါင်း ၁၂,၅၀၀ လောက်ထိ ကူးစက်ခံလားရပါဗျာလ်။
အော်ဆကာဆုရ ကဗာကျော် အမေရီကန်မင်းသားကြီး တွင်းမ် ဟန့်ဆ်(Tom Hanks)နန့် မယားသယ် မင်းသမီး ရဲ့တာ ဝဲလ်ဆင်(Rita Wilson)ရို့လည်း ကိုရိုနာဗိုင်းရာ့ဆ် သြစတြီးလီးယားနိုင်ငံက အကူးခံလာရပနာ၊ အဂု အိမ်တွင်းအောင်းနိန်ရရေလို့ Instagram မှာ တင်ထားပါရေ။