Covid-19 ကိုရိုနာဗိုင်းရာ့ဆ်စွာ ကဗာ့ကူးစက်ရောဂါအဆင့် ရောက်လားဗျာလ်လို့ ကဗာ့ကျန်းမာရေးအဖွဲ့(World Health Organization)က ကြေငြာလိုက်ပါရေ။
အဂုအခါ ကဗာ့နိုင်ငံပေါင်း ၁၁၄ နိုင်ငံမှာ၊ ကိုရိုနာဗိုင်းရာ့ဆ် ကူးစက်ခံရရေ လူပေါင်း ၁၁၈,၀၀၀ ကျော် ရှိလာပနာ၊ လူပေါင်း ၄,၂၉၁ ယောက် သီလားဗျာလ် ဖြစ်တေအတွက်၊ Covid-19 ကိုရိုနာဗိုင်းရာ့ဆ်ကို ကဗာ့ကူးစက်ရောဂါအဖြစ် သတ်မှတ်လိုက်ဗျာလ်လို့၊ အေနိ နိစဉ်သတင်းရှင်းလင်းချက်မှာ ဒဗြူအိပ်ချ်အို ညွှန်ချုပ်(WHO director-general) တီဒြိုဆ် အတ်ဟာနွင်း ဂီဘရီယီဆာ့ဆ်(Tedros Adhanom Ghebreyesus)က ပြောလားပါရေ။
“ကဗာ့ကူးစက်ရောဂါ ဆိုရေ စကလုံးကို လွယ်လင့်တကူနန့် ဂရုမထားဘဲ မသုံးနိုင်ပါ။ အေစကလုံးကို အမှားမှားအယွင်းယွင်း သုံးမိခကေ၊ မလိုအပ်ဘဲ ကြောက်လန့်ကတ်စွာတိ၊ ရောဂါပျောက်လားကေတောင် လက်မခံနိုင်ကတ်စွာတိ၊ မလိုလားအပ်တေ နစ်နာဆုံးရှုံးကတ်စွာတိ၊ သီဆုံးကတ်စွာတိ ဖြစ်လားနိုင်ပါရေ။” လို့ ညွှန်ချုပ်က ပြောလားပါရေ။
“ကဗာ့ကူးစက်ရောဂါ”အဆင့် သတ်မှတ်လိုက်စွာနန့် ကဗာ့ကျန်းမာရေးအဖွဲ့က အေကိုရိုနာဗိုင်းရာ့ဆ်ကို ကိုင်တွယ်နိန်ရေပုံစံနန့် လုပ်ဆောင်နိန်ရေ ပုံစံတိ၊ ပြောင်းလားဖို့ မဟုတ်ပါ။ တခြားနိုင်ငံတိ လုပ်ဆောင်နိန်ကတ်စွာလည်း ပြောင်းလဲလားဖို့ မဟုတ်ပါ။”
တချို့နိုင်ငံတိမှာ လုပ်ဆောင်နိုင်ရေ အင်အားမရှိလို့ ကိုရိုနာဗိုင်းရာ့ဆ်ကို ကိုင်တွယ်ဖြေရှင်းဖို့ အခက်အခဲ ရောက်နိန်ကတ်ရေပိုင်၊ တချို့နိုင်ငံတိမှာ ဖြေရှင်းဖို့ နည်းလမ်းမသိလို့လည်း ရုန်းကန်နိန်ကတ်ရပါရေလို့ တီဒြိုဆ် က ထပ်ဆင့်ပြောလားပါရေ။
