ကိုဗဲ့ဒ်-၁၉(Covid-19) ကိုရိုနာဗိုင်းရာ့ဆ်အတွက် ထိရောက်တေ ကာကွယ်ဆီးကို နောက်နှစ် ၂၀၂၁ ခုနှစ်၊ နွီဦးရာသီ(လက်ရှိဥရောပရာသီ)ထိ ရဖို့ လမ်းမမြင်သိမ့်လို့ ကဗာ့ကျန်းမာရေးအဖွဲ့ ဒဗြူအိပ်ချ်အို(WHO)က ပြောခွင့်ရပုဂ္ဂိုလ်၊ ဒေါင်တာ မာဂရတ် ဟာရဲ့ဆ်(Dr. Margaret Harris)က သတိပီးလိုက်ပါရေ။
ဆွစ်ဇာလန်နိုင်ငံ ဂျီနီဗာမြို့မှာ လုပ်တေ သတင်းစာရှင်းလင်းပွဲမှာ ဒေါင်တာ ဟာရဲ့ဆ် က “အကျွန်ရို့ ကာကွယ်ဆီးကို နောက် ၁၂ လ မဟုတ်ကေ၊ ယင်းနောက်ပိုင်းမှာတောင် မြင်ရဖို့လို့ မျှော်လင့်မနိန်သင့်ပါ။” လို့ ပြောလားပါရေ။
ကာကွယ်ဆီးတိထုတ်ဖို့အတွက် စမ်းသပ်မှုအဆင့်ဆင့်နန့်၊ သတ်မှတ်တားမြစ်ချက်တိ အများကြီး ရှိနိန်ရေအတွက်၊ ကကောင်း အချိန်ကြာတတ်ပနာ၊ ပုံမှန်ထိုးဆီးတိက ၅ နှစ်အထိ အချိန်ကြာတတ်တေလို့ ဆိုပါရေ။ လက်ရှိမှာ တချို့ ငှက်ဖျားကုသဆီး ဟိုင်ဒရိုဇီခလိုရိုကိန်း (hydroxychloroquine)ပိုင် ဆီးတိကို ကိုရိုနာဗိုင်းရာ့ဆ် ကုသစွာမှာ သက်ရောက်မှုအများကြီး ရှိရေလို့ ပြောနိန်ကတ်ကေလည်း၊ လက်တွိမှာ သက်သီပြလို့ရလောက်တေ အကျိုးသက်ရောက်မှု အထောက်အထားတိကို မတွိရပါ။
ယင်းထက်ပိုဆိုးစွာက ကိုရိုနာဗိုင်းရာ့ဆ် အကူးခံရပနာ၊ ပြန်ပျောက်လားရေ လူတိမှာ ကိုရိုနာဗိုင်းရာ့ဆ်ကို ပြန်တွိလာရစွာပါ။ ယကေလည်း ယင်းပိုင် ပြန်တွိရစွာက၊ ခန္ဓာထဲမှာ ဗိုင်းရာ့ဆ် ပြန်ပေါ်လာစွာလား၊ အပြင်က ပြန်အကူးခံရစွာလား တိတိကျကျ မသိရသိမ့်ပါ။
အမှန်တကယ်ရာ ပြန်ကောင်းလာရေ လူတိမှာ ဗိုင်းရာ့ဆ် ပြန်ကူးစွာတိကို ပြန်တွိလာရကေ၊ ခန္ဓာကိုယ်တိက ဗိုင်းရာ့ဆ်ကို အကြာကြီး မခုခံထားနိုင်ဆိုစွာ ပေါ်လွင်လာရေအတွက်၊ ကာကွယ်ဆီး ရခါမှရာ၊ အေကဗာ့ကူးစက်ရောဂါကို တားနိုင်ဖို့အနိန်အထားကို ရောက်လားပါဗျာလ်။ မဟုတ်ကေ၊ ရီလှိုင်းတိပိုင် ပေါ်လာလိုက်၊ ပျောက်လားလိုက်နန့် မဆုံးရေ သံသရာ ရှိနိန်ပါဖို့ဗျာလ်။
အေနိ ကိုရိုနာဗိုင်းရာ့ဆ် အကူးခံရရေ လူပေါင်း ၂ သန်း နားကို ကပ်လာပါဗျာလ်။ တရုတ်နိုင်ငံက လွဲကေ တခြားနိုင်ငံအများစုမှာ အများဆုံးအရေအတွက် ပမာဏတခုအထိ အကူးခံရပနာ၊ တဖြည်းဖြည်း ပြန်ယော့ကျလားရေ အနိန်အထားမျိုးကို မတွိရသိမ့်ပါ။
ကိုဗဲ့ဒ်-၁၉ ကို ၂၀၂၀ ခုနှစ် မာ့ချ်လ ၁၁ ရက်နိမှာ ကဗာ့ကူးစက်ရောဂါအဖြစ် ကြေငြာခပါရေ။
အေနိ လူ ၁,၀၀၀ အထက် ကူးစက်ခံနိန်ရရေ နိုင်ငံတိ အခြေအနေကို အောက်မှာ တွိနိုင်ပါရေ။
