တောင်ကိုးရီးယား မီဒီယာတိ သတင်းအရ အမေရီကန်တိ တောင်ကိုးရီးယားနန့် စစ်ရေးလေ့ကျင့်ရေအတွက် တောင်ကိုးရီးယားနန့် တွိဆုံဆွေးနွေးပွဲ တခုကို မြောက်ကိုးရီးယားက ပြန်ရုတ်သိမ်းလိုက်တေအပြင်၊ အမေရီကန်သမ္မတ ဒိုနယ်ဒ် ထရုန့် နန့် မြောက်ကိုးရီးယားဂေါင်းဆောင် ကင် ဂျုံအင်း ရို့ တွိဖို့စွာကိုလည်း ပြန်ပနာရုတ်သိမ်းဖို့လို့ ခြိမ်းခြောက်လိုက်ပါရေ။
လက်ရှိ တောင်ကိုးရီးယား နန့် အမေရီကန်တိ ပူးတွဲ လေ့ကျင့်နိန်ရေ မတ်ချ် တင်ဒါ (Max Thunder) စစ်ရေးလေ့ကျင့်မှုအတွက် တောင်ကိုးရီးယား နန့် ဆွေးနွေးဖို့စွာကို ပြန်ရုတ်သိမ်းလိုက်စွာ ဖြစ်တေလို့ မြောက်ကိုးရီးယား မီဒီယာတိကို ကိုးကားပနာ ယွန်ဟပ် (Yonhap) သတင်းမှာ ဖော်ပြထားပါရေ။
၂ ပတ်ကြာဖို့ မတ်ချ် တင်ဒါ (Max Thunder) စစ်ရေးလေ့ကျင့်မှု ၁၈ ကို ဗြီးခရေ သောက်ကြာနိန့်က စခပနာ၊ တိုက်လေယာဉ် F-22 တိနန့် ဗုံးကြဲလေယာဉ် B-52 တိ အပါအဝင်၊ လေယာဉ်ပျံ အစင်းပေါင်း ၁၀၀ ကျော် ပူးတွဲပနာ လေ့ကျင့်နိန်ပါရေ။
