ဖော်မြူလာ ဝင်း(Formula 1)လို့ လူသိများရေ ပြိုင်ကားတိပြိုင်ရေ မာစီဒီးဆ် ဖော်မြူလာ ဝင်း(Mercedes Formula One) ပြိုင်ကားအဖွဲ့နန့် လင်ဒင် ကောလိပ် တက္ကသိုလ်(University College London)က အိန်ဂျင်နီယာတိ၊ ယူစီအဲလ်အိပ်ချ်(UCLH)က ကျန်းမာရေးကျွင်းကျင်ပညာရှင်တိ ပူးပေါင်းပနာ၊ အသက်ရှူ အထောက်အကူပြု ကရိယာ၊ လီလမ်းကြောင်း ဖိအား ဒေါက်ချောက်ဖွင့် ကရိယာ(Continuous Positive Airway Pressure (CPAP))ကို တီထွင်လိုက်ကတ်ပါရေ။
အေကရိယာက ကိုဗဲ့ဒ် လူနာတိအတွက် မရှိမဖြစ် လိုလာပနာ၊ ရဖို့အခက်အခဲ ဖြစ််နိန်ရေ အသက်ရှူ အထောက်အကူပြုစက် ဗန်တီလတ်တာ(ventilator)တိအစား၊ အေ စီပီအေပီ ကရိယာနန့် လူနာတိ အဆုတ်ထဲကို အောက်ဆီဂျင်ကို တိုက်ရိုက်ထည့်ပနာ အစားထိုးသုံးလို့ရလာပါရေ။
တရုတ်နိုင်ငံနန့် အီတလီနိုင်ငံရို့မှာလည်း အေကရိယာတိကို သုံးနိန်ကတ်ပါရေ။
အဂု ယင်း စီပီအေပီ ကရိယာတိကို မာစီဒီးဆ်-အေအမ်ဂျီ အိပ်ချ်ပီပီ(Mercedes-AMG HPP)က ယူကေနိုင်ငံအတွက် အပူတပြင်း ထုတ်ပီးနိန်ပါရေ။ ညဇာက တရက်တည်းမှာ အခုရေ ၆၀၀ ထုတ်ပီးခပနာ၊ အေနိ အခုရေ ၁,၀၀၀ ထိ တိုးမြှင့် ထုတ်ပီးလားဖို့လို့ ဆိုပါရေ။ ယူကေ အစိုးရကတော့ အခုရေ ၁ သောင်းထိ မှာယူထားပါရေ။
